Фото: gov.kz
Абай облысында Алакөл көлін дамытуға арналған жаңа бас жоспар әзірленуде. Бұл туралы Орталық коммуникациялар қызметінде өткен брифингте облыс әкімі Берік Уәли мәлімдеді, деп хабарлайды Todayinfo.kz ақпарат агенттігі.
Президенттің тапсырмасына сәйкес, өңірде туристік инфрақұрылымды жетілдіруге бағытталған ірі жобалар жүзеге асырылып жатыр. Мақаншы ауданындағы Алакөл көлі — облыстың ең маңызды туристік және инвестициялық нысандарының бірі.
Биыл демалушыларға қолайлы жағдай жасау және жағалаудың инфрақұрылымын жақсарту бойынша нақты жұмыстар қолға алынды. Бұған дейін жөндеу көрмеген жағалауға жергілікті бюджеттен 1 млрд теңге бөлінді. Қабанбай ауылында құтқару станциясы мен өрт сөндіру депосының құрылысы басталды. Сонымен қатар, жаңа электр желісін тарту және қатты тұрмыстық қалдықтар полигонын салу бойынша жобалық құжаттар әзірленуде.
Берік Уәлидің айтуынша, алдағы уақытта көл маңын дамытудың кешенді жоспары жасалады.
«Жоба аясында жалпы ауданы 1 000 гектардан астам демалыс және туризм аймақтары құрылады. Сондай-ақ рекреациялық, қоғамдық және тұрғын аумақтарды дамыту қарастырылған. Көлік қатынасы, инженерлік желілер және экологиялық тұрақтылық басты назарда болады», — деді әкім.
Бас жоспардың мақсаты – ішкі туризмді күшейту, инвестиция тарту, жаңа жұмыс орындарын ашу және тұрғындар мен туристердің демалыс сапасын арттыру.
Жоба жүзеге асқанда, Қабанбай ауылы мен Алакөл жағалауының аумағы біріктіріліп, игерілген жер көлемі 3 мың гектарға дейін ұлғаяды. Бұл Алакөлді өңірдің негізгі туристік орталығына айналдыруға жол ашады.
Айта кетейік, жағалауды дамытудың маңызды бөлігі ретінде Әзербайжан инвесторларының қатысуымен «Алакөл» емдеу-сауықтыру кешенін салу жобасы қолға алынған. Екі ел басшылары 21 қазанда осы жоба бойынша келісімге қол қойды. Қазір құрылыс орнын бекіту және дайындық жұмыстары жүргізілуде.
