Белгілі әнші, ҚР еңбек сіңірген қайраткері Нұрлан Өнербаев 37 жыл бойы орындап келген «Анашым» әнін енді айтып жүрмейді. Бұл өзгерістің себебін әннің авторы, Қазақстанның еңбек сіңірген артисі, композитор Марат Омаров түсіндірді, деп жазады Todayinfo.kz ақпарат агенттігі.
Композитордың айтуынша, жылдан-жылға тыңдарман бұл туындыны Өнербаевтың жеке әні деп қабылдай бастаған.
– Нұрлан бұл әнді халыққа кеңінен танытты, өзінің ерекше баритон даусымен жанын салды. Бірақ уақыт өте жұрт әнді толықтай Өнербаевтікі деп ойлап кетті. Караокелерде де әннің орындаушысы ретінде тек Нұрланның аты тұрады, ал авторлары жайлы еш ақпарат жоқ. Жұртшылық маған осыны жиі айтады. Жақында әннің сөзін жазуға үлес қосқан марқұм Қайрат Жұмағалиевтің қызы хабарласып, әкесінің аты аталмайтынына қынжылыс білдірді, – дейді Марат Омаров «Бүгін LIVE» бағдарламасына берген сұхбатында.
Ол біреудің еңбегін өз атынан қолдануға болмайтынын да атап өтті.
– Бұрын да белгілі сазгерлер Кеңес Дүйсекеев пен Шөмішбай Сариев «Нұрлан әнді тамаша орындайды, бірақ авторларын таныстыруға мән бермейді» деп айтатын. Өнер жұлдызы Ержан Белғозиев те менің «Бауырды сағыну» әнімді айтады, бірақ авторын атап өтпегені үшін ренішін жеткізген еді, – деді композитор.
