13 қараша күні шамамен 18:00 шамасында Алатау ауданында кең көлемді апат орын алып, бірнеше шағынаудан электр энергиясынсыз қалды. Алдын ала мәлімет бойынша, жоғары кернеулі желілердің зақымдануына «MAGNUM E-COMMERCE KAZAKHSTAN» ЖШС тапсырысы негізінде МП «ГазЭнерджи» ЖШС жүргізген газ құбырын көлденең бағытта бұрғылау (ГНБ) жұмыстары себеп болған. Бұрғылау кезінде кабель желілеріне тиген зақым апатты жағдайды туындатқан, деп хабарлайды Todayinfo.kz ақпарат агенттігі.
Апат анықталған сәттен бастап мамандар түн бойы күшейтілген режимде жұмыс істеді. Жедел бригадалар бірқатар учаскелерді тексеріп, жөндеу жұмыстарын ұйымдастырды. Нәтижесінде 00:15-те бірінші желі толық қалпына келтіріліп, жарықтың бір бөлігі тұтынушыларға қайта берілді.
14 қараша таңертең жағдай айтарлықтай тұрақталып, электр энергиясы Саялы, Ақбұлақ, Зерделі шағынаудандарына толық берілді. Сонымен қатар Софья және Арена Парк тұрғын үй кешендеріне, сондай-ақ Ақкент пен Дарабоз кешендерінің бір бөлігіндегі үйлерге де жарық жеткізілді.
Қазіргі таңда электр энергиясынсыз қалып отырған аймақтар:
• Теректі шағынауданы – 5 көше
• Алғабас шағынауданы – 5 көше
• Ақкент ТҮК – 10 үй
• Нұркент ТҮК – 14 үй
Мамандар зақымданған аумақтарды қалпына келтіру үшін қазір жер қазу жұмыстарын жүргізіп жатыр. Қазба жұмыстары аяқталған соң, бригадалар муфта орнатып, желіні толық қалпына келтіруді бастайды.
Қала әкімдігі мен сала мамандарының мәліметінше, барлық жөндеу жұмыстары жоспар бойынша аяқталып, электрмен жабдықтау бүгін сағат 18:00-ге дейін толық қалпына келтіріледі.
Жағдай бақылауда, қосымша ақпарат беріліп отырады.
