Фото: видео скриншот
Әнші Динара Алжан Kezdesu жобасына берген сұхбатында ер адамдар мен қарым-қатынас туралы көзқарасымен бөлісіп, әлеуметтік желіде үлкен резонанс тудырды, деп хабарлайды Todayinfo.kz ақпарат агенттігі.
Желі қолданушылары арасында қызу пікірталас тудырған сөздердің негізгі бөлігі ер азаматтардың мінез-құлқы мен отбасындағы рөліне қатысты болды.
Әншінің айтуынша, ер адамдардың «қызмет бабы немесе жеке өмірде қыдыруы — қалыпты нәрсе» екен.
«Қыдырмайтын еркекті еркек деп айтпаймын. Ер азаматтың өзіне де уақыт керек. Егер ол тек үйінде отырып, ешкіммен араласпай қалса, өмірдің қызығы жоғалады. Әрине, қызғаныш та, сүйіспеншілік те бар. Бірақ шын жақсы көретін әйел бәріне шыдай алады», — деді Динара Алжан.
Ол сондай-ақ ер мен әйелдің қарым-қатынасы қандай болуы тиіс деген сұраққа да жауап берді.
«Ер адамды еркелетіп, сыйлап, аяғына дейін күтім көрсету керек. Тіпті аяқ киімін кигізіп беруге болады. Ер азаматқа көңіл бөлсең, ол ешқайда кетпейді. Қазір көп қыздар ерлерді жамандап жатады, бұл — дұрыс емес. Ер адамды құрметтесек, біз де гүлдейміз», — деп пікірін жалғады ол.
Алайда бұл сөздер әлеуметтік желі қолданушылары тарапынан бірден сынға ұшырады. Комментарийлердің басым бөлігі әншінің айтқанымен келіспейтінін білдірді.
Пікір қалдырғандардың кейбірі:
-
«Түк көрмегендер осылай ақыл айтатын болды»,
-
«Әр нәрсені сөйлей бермей, өзіңе қара»,
-
«Өз қызыңа сондай ер жетсін»,
-
«Қоғамды бұзатын сөздер айтпа», — деп жазды.
Динара Алжанның бұған дейін Болат Назарбаевтың тоқалы болғанын ашық айтуы да оның атына деген қызығушылықты арттырғаны белгілі. Ал бұл жолғы сұхбаты жұрт арасында тағы бір толқуға себеп болды.
