Ақын әрі драматург Бақыт Беделхан бүгінгі қоғамда отбасы құндылығының әлсіреп бара жатқанына қатты алаңдайтынын айтты, деп хабарлайды Todayinfo.kz ақпарат агенттігі.
Оның пікірінше, әйелдердің санасын өзгертіп, отбасындағы тепе-теңдікті бұзып жатқан – кейбір психологтардың кеңестері.
Беделханның айтуынша, психологтар әйелдерге «еріңе қызмет етуге міндетті емессің», «ата-енең саған ешкім емес», «өмірге бір-ақ рет келесің, өз қызығыңа өмір сүр» деген кеңестерді тым үстірт әрі жауапсыз айтады.
«Осыны естіген кейбір әйелдер шынжырынан босап кеткендей күйге түседі. Эго өседі, отбасындағы тәртіп пен сыйластық әлсірейді», – дейді ол.
Ақын биліктің әйелдерді тым «қорғауға» бағытталған заңдары да отбасыдағы тепе-теңдікке кері әсер ететінін айтады.
«Осының бәрі қазақ отбасын жүйелі түрде ірітуге әкеледі. Бұл – бірлікке, отансүйгіштікке балта шабу», – деп алаңдайды Беделхан.
Сондай-ақ ол әлеуметтік желідегі кей блогерлердің әсеріне тоқталды:
«Лентаңды ашсаң, алдымен Мөлдір мен Бадықова шығып тұрмай ма деп қорқамын. Олардың айтқандары шалғай аймақтағы халықтың санасын шатастырып жібереді. Әйелдер өзін оларға теңеуге тырысады, бірінен қалмауды мақсат етеді», – дейді ол.
Ақынның айтуынша, қазіргі күйдегі қоғамда отбасы құндылығы «әйелдердің проблемасы» деген түсінікке айналып кеткені тіпті қынжылтады.
Сондықтан ол отбасы тәрбиесі мен ұлттық дәстүрлерді мемлекет деңгейінде қайта қарауды, депутаттардың да бұл мәселеге салмақты көңіл бөлуін сұрайды.
