Бирма боксы бойынша Азия чемпионы атанған Нұрмағамбет Тұрарбековтің бауыры Instagram-де видеоүндеу жариялап, спортшылар апатына себеп болған жағдайларды ашық айтты, деп хабарлайды Todayinfo.
Оның айтуынша, чемпионатқа спортшылар 22 орындық Mercedes Sprinter көлігімен барған. Бірақ автобусқа орыннан көп адам мінген, үш спортшы орын жетпеген.
«22 орындық көлікке 19 спортшы ғана сыйып, тағы 3 бала орын тапшылығынан бөлек жолға шығуға мәжбүр болған. Осы қауіпсіздікке сай келмейтін ұйымдастыру-апатқа әкелген негізгі себептердің бірі. Жолдағы қауіпсіздікке кім жауап береді? Спортшылардың өмірін кім қорғауы тиіс? Спорт министрлігі және осы жарыстың ұйымдастырушылары, демеушілері, тренерлері бұл сұраққа жауап берулеріңізді талап етеміз!»,- деді жігіт.
Чемпионат 19:00-де аяқталғанымен, спортшыларға елордада түнде қалуға рұқсат берілмепті. Топ 22:00-де Семейге қарай жолға шыққан. Кері қайтар жолда ауыр апат болып, Нұрмағамбет пен тағы екі спортшы және бір жаттықтырушы қаза тапты.
Еске салсақ, 2 қараша таңғы 05:45-те Омбы – Майқапшұғай тас жолында Toyota Avensis пен Howa жүк көлігі соқтығысып, жеңіл көліктегі үш адам оқиға орнында көз жұмды.
Әлихан Бөкейхан университеті қаза тапқандардың арасында өз студенттері болғанын растады.
