Ақмола облысында жергілікті маңызы бар автожолдарды дамыту жұмыстары биыл да жоғары қарқынмен жалғасуда. Аймақта жолдарды салу мен жөндеуге 65 млрд теңге бөлініп, 150-ге жуық жоба іске асырылды. Оның ішінде 60-қа жуық елді мекеннің көше-жол желісі жөнделіп, бірінші кезекте бұрын басталған жобаларды аяқтауға басымдық берілді, деп хабарлайды Todayinfo поралы.
Жергілікті маңызы бар жолдардың ішінде биыл бірқатар ауқымды жобалар жүзеге асуда. Олардың қатарында «Щучье–Степняк», «Бабатай–Волгодоновка–Береке–Бұлақсай», «Ақкөл–Азат–Новорыбинка», «Щучье–Николаевка», «Еленовка–Чистополье–Есіл», «Бұзылық–Алматы» бағыттары бар.
«Қысқы кезеңде бас мердігер «Сервис НС» ЖШС өзінің жауапкершілігіне бекітілген учаскеде қызмет көрсетуді жүзеге асырады. Бұл учаске – «Жақсы – Есіл – Бұзылық» республикалық маңызы бар автомобиль жолының 80–82 шақырымындағы Есіл өзені арқылы өтетін көпірді салумен қоса жүргізілетін күрделі жөндеу нысаны»,-деп қосты «Қазавтожол» ҰК» АҚ Ақмола филиалы директорының орынбасары Рүстем Әбілов.
Сонымен қатар, жол жөндеу жұмыстары тек Көкшетау қаласында ғана емес, Қосшы, Талапкер, Қоянды, Қараөткел, Зеренді, Атбасар, Державинск, Қорғалжын және басқа да елді мекендерде қарқынды жүргізіліп жатыр. Жол құрылысының сапасын бақылау мақсатында Жол активтерінің ұлттық сапа орталығымен 250 млн теңгелік келісімшарт жасалған.
«Облыстағы барлық жолдарды бір жыл ішінде жөндеу мүмкін емес. Сарапшылардың есептеуінше, өңірдегі барлық жергілікті жолдарды нормативке келтіру үшін кемінде 300 млрд теңге қажет. Сондықтан басымдық алдымен халық тығыз орналасқан ауылдар, өндірістік нысандарға баратын жолдар, бірнеше елді мекенді қосатын бағыттар бойынша беріледі»,-деді басшы.
Үкімет бекіткен негізгі мақсат 2029 жылға дейін жергілікті жолдардың 95%-ын нормативтік деңгейге жеткізу. Соңғы үш жылда өңірде 2,7 мың км жол жөнделіп, жаңартылған. Сонымен қатар, Ақмола облысының жолдары қысқы кезеңге жан-жақты дайындалуда. Қысқы техникалық қызмет көрсету 12 мың км жолды қамтиды.
2025 жылдың қараша–желтоқсан айларына 1021 бірлік техника мен 5,4 мың тонна жанармай, және 8 мың тонна тайғаққа қарсы материал қарастырылған.
Облыстық, аудандық және елді мекендер деңгейінде арнайы техника дайындалып, мердігер ұйымдармен келісімшарттар жасалды. Қардан тазалау, құм-тұз себу, патрульдеу жұмыстары тәулік бойы жүргізіледі.
Өңірде жол сапасын жақсарту және қысқы қауіпсіздікті қамтамасыз ету бағытында жүйелі жұмыс жүргізілуде. Қабылданған шаралар автожолдардың қолжетімділігін арттырып, тұрғындардың қауіпсіз және жайлы қозғалысын қамтамасыз етеді.
