Алматыда «Ұлы Жібек жолымен – 2025» XIII Халықаралық кітап және полиграфия көрмесі ұйымдастырылды. Шара аясында кітап ісіндегі өзекті мәселелер бойынша конференция өтті, деп хабарлайды Todayinfo.kz ақпарат агенттігі.
Іс-шараның мақсаты – баспа индустриясын дамыту, тарихи еңбектердегі объективтілік пен архивтік деректерді қолдану сапасын көтеру, сондай-ақ кітап саласына қатысты заңнамалық өзгерістер бойынша кәсіби пікір алмасу.
Жиынға қатысқан тарих ғылымдарының докторы, Мемлекет тарихы институты Деректану, Отан тарихы және тарихнама бөлімінің басшысы Ғани Қарасаев тарихи-әдеби шығармалар мен ғылыми еңбектерде деректерді өзгерту аса ауыр қателік екенін атап өтті. Оның айтуынша, тарих ғылымындағы кез келген зерттеу қоспасыз, дәл және архивтік деректерге негізделуі тиіс, өйткені тарих математика сияқты нақты дәлдікті талап етеді.
«Тарихи білімі жоқ әуесқой авторлардың асыра сілтеуі, үстірт пайымдары немесе тереңіне үңілмеуі шындықты бұрмалап, қоғамды адастыруы мүмкін. Сондықтан тарихи тақырыпқа қалам тартқан әр автордың жанында кәсіби тарихшы кеңесші болуы қажет. Мемлекет басшысының «Тарихты тек тарихшылар жазуы керек» деген пікірі де үлкен жауапкершілік жүктейді. Себебі ғылыми даярлығы жоқ адамдардың авторлық интерпретациялары рулық немесе туыстық деңгейдегі бұрмалауларға апаруы мүмкін», – деді Ғани Мұқашұлы.
Басқосуда отандық баспа ісін дамыту, кітап ісі туралы заңының қажеттігі, сондай-ақ тарихи тақырыптардың бұрмалануы мен деректердің ғылыми дәлдігін сақтау, деректану мәдениетін арттыру мәселелері жан-жақты сөз болды.
Дөңгелек үстелге кітап саласының мамандары, баспа өкілдері, тарихшылар мен сарапшылар қатысты.
