Алматыда көлік салығын төлемеген жүргізушілерге қарсы қатаң шаралар қолданыла бастады. «Борышкер» жедел-профилактикалық іс-шарасы аясында қарызы бар азаматтардың көліктері тәркіленіп, айыптұрақтарға жөнелтілуде.
Борышкерлер қалай анықталады?
Алматы қаласы бойынша Мемлекеттік кірістер департаментінің хабарлауынша, рейд полиция қызметкерлері және Жеке сот орындаушыларының өңірлік палатасымен бірлесіп жүргізіліп жатыр.
Борышкерлерді анықтау жүйесі келесідей жұмыс істейді:
-
«Сергек» камералары: Қарызы бар көліктерді жол қозғалысы кезінде камералар автоматты түрде тіркейді.
-
Сот орындаушысының қаулысы: Көлікті тәркілеуге жеке сот орындаушысының арнайы қаулысы негіз болады.
-
Айыптұраққа қою: Ұсталған көлік иесі салық берешегін толық өтегенге дейін айыптұрақта тұрады.
Қарыз көлемі 4,5 миллиард теңгеге жетті
Ресми мәліметтерге сүйенсек, қазіргі таңда мегаполистегі көлік салығы бойынша жалпы берешек 4,5 миллиард теңгені құрайды.
Департамент өкілдерінің айтуынша, қарыздың негізгі бөлігі «люкс» санаттағы және қуатты көліктерге тиесілі. Нақтырақ айтқанда, қозғалтқыш көлемі 4000 текше сантиметрден (4.0 литр) асатын автокөлік иелері салық төлеуге асығар емес.
Артық шығынға батпас үшін не істеу керек?
Мемлекеттік кірістер департаменті көлік иелерін салық қарыздарын дереу тексеріп, уақтылы төлеуге шақырады. Бұл сізге екі түрлі келеңсіздіктен құтылуға көмектеседі:
-
Көлігіңіздің айыптұраққа қамалуының алдын аласыз;
-
Сот орындаушыларының қызметіне ақы төлеу сияқты қосымша қаржылай шығындардан құтыласыз.
Еске сала кетейік, көлік салығы бойынша берешекті e-Salyq Azamat мобильді қосымшасы немесе банк қосымшалары арқылы тексеруге болады.
