Фото: Алматы облысының әкімдігі
Алматы облысының әкімі Марат Сұлтанғазиевтің айтуынша, өңірге инвесторлардың қызығушылығы жыл сайын артып келеді. Сондықтан оларға барынша қолайлы жағдай жасау – әкімдік жұмысының басым бағыттарының бірі, деп хабарлайды Todayinfo.kz ақпарат агенттігі.
«Инвесторлардың өңірге деген қызығушылығы жоғары екенін ескерсек, олар үшін ыңғайлы орта қалыптастыру — басты мақсатымыз. Бұл бағыттағы ең тиімді құралдардың бірі — индустриялық аймақтарды дамыту», – деді әкім.
Оның сөзінше, өткен жылы ашылған «Қайрат» индустриалдық аймағында құны 47 млрд теңге болатын 4 жоба іске қосылған. Сонымен қатар 66 млрд теңгеге 19 жоба бойынша құрылыс-монтаж жұмыстары жүргізіліп жатыр.
Сұлтанғазиевтің айтуынша, осы табысты тәжірибенің негізінде жаңадан 15 индустриалдық аймақ құрылуда. Олардың қатарында:
Талғар ауданындағы «Қайрат-2», Еңбекшіқазақ ауданындағы «Шелек», Жамбыл ауданындағы «Қазыбек Бек» және «Үлкен», Ұйғыр ауданындағы «Тасқарасу» мен «Сұңқар», Қонаев қаласындағы «Қонаев», Алатау қаласындағы «Береке» және Үлкен Алматы айналма жолының маңындағы 7 аймақ.
«Қайрат-2» индустриалдық аймағы шетелдік инвесторлардың қаржысына салынып жатса, Үлкен Алматы айналма жолы бойындағы аймақтар жер иелерімен бірлесіп жүзеге асырылуда», – деді өңір басшысы.
Әкімнің айтуынша, жүргізіліп жатқан шаралар ірі кәсіпорындарға ғана емес, шағын және орта бизнеске де кең мүмкіндік ашып отыр.
«Бүгінде шағын және орта бизнестің жалпы өңірлік өнімдегі үлесі 46,3%-ға жетті. Кәсіпкерлік субъектілерінің саны 156 мыңнан асты (2022 жылы – 116,6 мың), яғни өсім 33,8% болды. Бұл салада қазір 273 мың адам жұмыс істейді — бұл өңірдегі жұмыспен қамтылғандардың үштен бір бөлігі», – деді Марат Сұлтанғазиев.
