Алматы облысы әкімінің бірінші орынбасары Қанат Есболатов жарымжан жандар туралы сөзі үшін халықтан кешірім сұрады деп, хабарлайды Todayinfo.
Ол Талғарда өткен жиында «мүгедектерді құдай онсыз да жазалаған» дегенді айтып қалған.
«Әлеуметтік желіде тараған видеоға қатысты ақпарат беруді жөн деп санаймын. Денсаулық сақтау министрімен Талғарда өткен кездесуге қалың жұрт жиналды. Әрқайсысы өзекті мәселе көтеріп, сұрақ қоюға асықты. Сондықтан кезек те үлкен болды. Регламент бойынша кездесуге екі сағат бөлінген еді. Бірақ, сұрақтардың көп болуына байланысты жиын шамамен 4 сағатқа созылды», — деді ол.
Ол өз ойын дұрыс жеткізбегенін айтты.
«Келген азаматтардың арасында бірқатар мүмкіндігі шектеулі жан болды. Кейбірі тік тұрып, өз кезегін күтті. Кезегі жеткенде залдағы бірнеше адам сөзін бөліп, оған кедергі жасай бастады. Регламентті сақтауға шақырдым. Алайда орыс тілінде айтқан сөзімде қателік бар. Ойымды дұрыс жеткізбеппін. “Құдай үлкен сынақ берген” деп айтпақ болғанмын. Айтқан сөзім көпшіліктің көңіліне, тіпті намысына тигенін де түсіндім. Осы үшін шын ниетіммен кешірім сұраймын.
Ауқымды іс-шараларда алдымен егде жастағы тұрғындарға және мүмкіндігі шектеулі азаматтарға жол беру маңызды. Қай жиын болмасын, оларды көп күттірмей, кезексіз тыңдау – дұрыс әрі адамгершілікке сай деп есептеймін.
Сіздердің пікірлеріңіз бен реакцияларыңыз мен үшін өте маңызды. Жиында көтерілген әр сұрақты әкімдік пен министрлік назарға алды, көпшілігіне сол жерде жауап берілді. Қосымша пысықтауды қажет ететін мәселелер хаттамаға енгізіліп, бақылауға алынды. Министрлікпен бірге бұл бағыттағы жұмысты жалғастырамыз. Белсенділік танытқандарыңыз үшін баршаңызға тағы да алғыс айтамын»,- деді әкім орынбасары.
Фото: @esbolatovkanat
