Президент Қасым-Жомарт Тоқаевтың бастамасымен жарияланған Жұмысшы мамандықтар жылы аяқталуға жақын. Алайда, атаулы жылда айқындалған қарқын мен серпін сақталып, алдағы уақытта одан әрі арта түспек. Алматы үшін бұл кезең техникалық және кәсіптік білім беру (ТжКБ) жүйесін жаңғыртудың бастау нүктесіне айналды. Нақтырақ айтқанда, жаңа сапа стандарттары, басымдықтар мен даму бағыттары белгіленді. Себебі, колледждер қаланың экономикасына қажет кадрларды даярлайтын негізгі буын болып отыр, деп хабарлайды Todayinfo.
Алматы құрылыс-техникалық колледжінің базасында қала әкімінің орынбасары Абзал Нүкеновтің төрағалығымен мегаполистегі ТжКБ жүйесін дамыту мәселелері бойынша кеңейтілген жиын өтті. Жиынға білім басқармасы, колледждер басшылығы, прокуратура өкілдері, Білім сапасын қамтамасыз ету департаменті, Полиция департаменті және «Атамекен» өңірлік кәсіпкерлер палатасының өкілдері қатысты.
Кездесу Жұмысшы мамандықтар жылының қорытындыларын бекітіп, қол жеткізілген нәтижелерді тұрақты тәжірибеге айналдыруды мақсат етті. Айталық, мамандар даярлау мазмұнын жаңартудан бастап, колледждердегі қауіпсіздік пен тәрбие жұмысын күшейтуге дейінгі қадамдар талқыланды. ТжКБ жүйесінде қаланың ұзақ мерзімді бәсекеге қабілеттілігін айқындайтын кәсіби әлеует қалыптасатыны атап өтілді.
Жиын басында Абзал Нүкенов колледждердің қала экономикасына қажетті мамандар даярлаудағы маңызды рөлін атап өтіп, ТжКБ жүйесінің қазіргі жай-күйіне және Президент жүктеген міндеттерге тоқталды. Сонымен қатар ол WorldSkills Kazakhstan ұлттық чемпионатында Алматы қаласының атынан қатысатын команда мүшелерін құттықтап, сәттілік тіледі.
Жиында «Заң және тәртіп» тұжырымдамасын іске асыру, жастар арасында құқықтық мәдениет пен құқықтық сананы қалыптастыру, азаматтық және құндылықтық бағдарларды нығайту, кәмелетке толмағандардың құқықтарын қорғау және жасөспірімдер арасындағы құқықбұзушылықтың алдын алу мәселелеріне ерекше назар аударылды. Осыған байланысты прокуратура және полиция өкілдері студенттердің қауіпсіздігіне қатысты негізгі тәуекелдерді, прокурорлық қадағалау шараларын және заңнаманы сақтау бойынша ТжКБ ұйымдары басшыларының жауапкершілігін түсіндірді. Сондай-ақ колледждердің ювеналдық полициямен, сүйемелдеу қызметтерімен және «тәуекел тобындағы» отбасылармен жұмысын күшейтіп, алдын алу шараларын жүйелі жүргізуді ұсынды.
Білім сапасын қамтамасыз ету департаменті (БСҚЕ) 2025 жылғы ТжКБ ұйымдарына жүргізілген бақылау-қадағалау жұмыстарының қортындысын таныстырып, проблемалық бағыттарды және білім беру процесінің сапасын арттыру мен мемлекеттік стандарттардың орындалуын қамтамасыз етуге қатысты келесі қадамдарды атап өтті.
Бизнес пен білімнің әріптестігіне арналған бөлімде «Атамекен» өңірлік кәсіпкерлер палатасы колледждер мен жұмыс берушілер арасындағы ынтымақтастықты кеңейтуге қатысты ұсыныстарын ортаға салды. Соның қатарында дуальды оқытуды дамыту, бизнес өкілдерінің материалдық-техникалық базаны жаңартуға қатысуы, оқу бағдарламаларын еңбек нарығының нақты сұраныстарына бейімдеу, заманауи өндіріс пен қызмет көрсету саласының талаптарына дайын мамандар даярлау сынды ұсыныстар жасалды. Сонымен бірге, жергілікті кәсіпорындармен бірлесе отырып арнайы Кеңес құру және көктемнен бастап хакатон форматында шаралар ұйымдастыратылатындығы айтылды.
Алматы қаласы Білім басқармасының басшысы Сайран Сайфеденов Президенттің бастамасы мен Жұмысшы мамандықтар жылының өткізілуінің арқасында колледждер мен жалпы ТжКБ жүйесіне жаңа деңгейде талап қойылғанын атап өтті: енді жай ғана түлек емес, бәсекеге қабілетті, икемді, тәртіпті мамандар даярлау күтіледі. Алдағы кезеңнің басымдықтары ретінде студенттермен тәрбие және алдын алу жұмыстарын күшейту, қауіпсіздік мәселелері бойынша ведомствоаралық өзара іс-қимылды дамыту, білім беру бағдарламаларының сапасын арттыру, әлеуметтік және индустриялық әріптестікті нығайту белгіленді.
Жиын қорытындысы бойынша ТжКБ жүйесінде кадр даярлау, колледждердегі қауіпсіздік пен құқық тәртібін қамтамасыз ету, тәрбие жұмысын нығайту, мемлекеттік органдар және бизнес қауымдастығымен ынтымақтастықты дамыту, сондай-ақ барлық студенттер үшін қолайлы, қауіпсіз және қолдаушы білім беру ортасын қалыптастыруға бағытталған шаралар кешенін қамтитын резолюция қабылданды.
Алматыда Жұмысшы мамандықтар жылы аяқталған атаулы кезең емес, керісінше техникалық және кәсіптік білім жүйесін, мегаполистің ұзақ мерзімді кадрлық саясатын қалыптастырудың жаңа бастауы ретінде қарастырылуда.
