Мәжіліс депутаты Ринат Зайыт міндетті әлеуметтік медициналық сақтандыру (МӘМС) жүйесінің қазіргі жағдайына қатысты өз көзқарасын білдірді. Депутаттың айтуынша, азаматтар жарна төлегенімен, көптеген жағдайда тиісті медициналық көмекті толық көлемде ала алмай жүр.
Журналистер аймақтарда дәрі-дәрмек тапшылығы мен жабдықтардың жеткіліксіздігі жөнінде сұрағанда, Ринат Зайыт бұл түйткілдердің түпкі себебі – МӘМС жүйесінің тиімді жұмыс істемеуі екенін атап өтті.
Оның пікірінше, ең алдымен денсаулық сақтау саласының ішкі мәселелерін реттеп, қызмет сапасын жақсартпайынша, халықтан қаржылық жарна талап ету дұрыс емес.
«Біз мұны бұрын да айтқанбыз. Медицинаны толық жүйелеп, кемшіліктерін жоймай тұрып халықтан төлем сұрау — үйге су кірмей тұрып, сол судың ақысын талап етумен бірдей. Үйде су жоқ, бірақ төлем талап етіледі. Бұл қашанға дейін созылады?» — деді депутат.
Сондай-ақ ол МӘМС жүйесіне енгізілген өзгерістер болғанымен, денсаулық сақтау саласына жауапты ведомство нақты ынта танытпайынша, реформалар күткен нәтижесін бермейтінін жеткізді.
«Жүйе түбегейлі жетілмейінше, ауқымды өзгерістер болады деп айта алмаймын», — деп түйіндеді Ринат Зайыт.
Фото: gov.kz
