Түркиялық әскери өнеркәсіп әлемдік авиация тарихында жаңа парақ ашты. Bayraktar Kızılelma пилотсыз жойғышы сынақ кезінде әуедегі нысананы зымыранмен дәл көздеп, атып түсірді. Бұл – бұрын-соңды әлемдік тәжірибеде болмаған оқиға.
Сынақ жұмыстары Синоп қаласының маңындағы әскери полигонда өтті. Baykar компаниясының хабарлауынша, дрон реактивті қозғалтқышы бар жоғары жылдамдықтағы нысанаға шабуыл жасаған.
Kızılelma-ның борттық радары нысананы дер кезінде анықтап, оны автоматты түрде бақылауға алған.
Теңдессіз дәлдік және әлемдік рекорд
Радар нысананы ұстаған сәтте, дронның қанатынан «әуе-әуе» класындағы зымыран жіберілді. Өндірушілердің мәлімдеуінше, соққы мүлтіксіз дәл тиіп, нысана толығымен жойылған.
Сарапшылардың пікірінше, қазіргі таңда әлемде жасалып жатқан пилотсыз ұшақтардың басым бөлігі тек жердегі нысандарды атқылауға арналған.
Ал Bayraktar Kızılelma әуедегі ұрыс қимылдарын жүргізе алатын әлемдегі алғашқы және әзірге жалғыз платформа атанып отыр. Компания өкілдері бұл жетістікті «авиация тарихындағы жаңа тарау» деп атады.
F-16 жойғыштарымен бірге жасалған маневр
Тарихи сынаққа Түркия әскери-әуе күштерінің бес бірдей F-16 жойғыш ұшағы қатысты. Олар жаңа дронмен қатар сап түзеп ұшып, болашақ әскери операциялардың тактикасын пысықтады.
Бұл «ақылды» дронның басты артықшылығы – заманауи датчиктерінің арқасында жау ұшақтарын алыстан сезу қабілеті.
Жүйе «өзі көрінбей тұрып, жауды көру және соққы беру» қағидасы бойынша жұмыс істейді.
Айта кетейік, Baykar компаниясы бүгінде әлемдегі ең ірі дрон өндіруші саналады. Компания өнімдері 37 елге экспортталып, жалпы табысының 90 пайызын сыртқы саудадан табады.
