Мұғалімдерге тағы бір жаза. Оқу-ағарту вице-министрі Оспан Еділ ұстаздарға қатысты мәлімдеме жасады. Білім беру ұйымдарында егер агрессия мұғалім тарапынан шықса, оған қомақты айыппұл салынады. Шенеунік мұндай жағдайда мұғалімдерге 50 АЕК (184 600 теңге) көлемінде айыппұл салынатынын айтты.
«Елімізде «Педагог мәртебесі туралы» заң қабылданып, онда әрбір ұстаздың міндеті мен жауапкершілігі нақты айқындалған. Педагогикалық әдеп нормаларын білу – олардың кәсіби шеберлігін, сондай-ақ еңбек тәртібін бағалау критерийлерінің бірі. Мұғалім әдебін бұзу тәртіптік әрекет болып табылады, ол үшін тәртіптік жауапкершілік көзделген.Әкімшілік кодексте мұндай жауапкершілік қарастырылған. Мұғалімнің оқушыларға психологиялық немесе физикалық зиян келтіргені расталса, ол үшін 50 АЕК көлемінде айыппұл салынады», – деді ол.
Спикер министрлікке мұғалімдерге қатысты мұндай шағымдардың жиі түсетінін айтты.
«Әрбір өтінішті білім сапасы жөніндегі комиссия мұқият қарайды. Әрбір жағдайда қызметтік тексеріс жүргізіліп, шаралар қабылданады. Қазір мұғалімдер конкурстық негізде жұмысқа қабылданады, онда комиссия нақты үміткерге мұғалім этикасын білетін не білмейтіні туралы сұрақ қояды», — деп қосты вице-министр.
