Наурыз мерекесі аясында Алматының барлық білім беру ұйымында «Күй күмбірі» республикалық челленджі өтті. Іс-шараға Құрманғазының «Балбырауын», «Адай», «Сарыарқа» және т.б. күйлерін орындаған 50 мыңнан астам домбырашы қатысты, деп хабарлайды Todayinfo агенттігі.
Қазақстан Республикасының Президенті Қасым-Жомарт Тоқаев домбыраның қазақ халқы үшін қасиетті аспап екенін, ол туралы аңыздар жазылып, ұрпақтан-ұрпаққа беріліп келе жатқанын атап өткен болатын. Домбыраның салт-дәстүріміз бен мәдениетімізде, тарихымызда алатын орны ерекше екені белгілі. Осы орайда Оқу-ағарту министрлігінің ұйымдастыруымен өскелең ұрпақтың бойында рухани-адамгершілік құндылықтар мен патриоттық сезімдерді қалыптастыруға, елдің мәдени мұрасын жалғастыруға, балалар арасында домбырада ойнауды насихаттауға бағытталған ауқымды іс-шара өтті.
Домбырашылар челленджінің мақсаты — балалар мен жастардың, мұғалімдер мен ата-аналардың музыкадағы шығармашылық жетістіктерін көрсету және домбыраны дәріптеу. Аталған Республикалық челенджге Алатау ауданынан 530-ға жуық оқушы қатысып, бір мезетте Құрманғазының «Балбырауын» күйін орындады.
Алматы қаласы білім басқармасының мәліметінше, күйлер бір уақытта қаланың 215 мектебі мен 20 колледжінде орындалды.
«Мен бала кезімнен домбырада ойнаймын, бұл керемет музыкалық аспапты өте жақсы көремін. Домбырада ойнау балаларды ғана емес, ересектерді де тәрбиелеп, оларды қазақ халқының өнер тарихын білуге жол ашады. Челлендж аясында домбырада бірге ойнағанымыз керемет, шабыт береді. Бүгінгі іс-шараның наурызға орайластырылғаны қуантады, сондықтан алматылықтарға амандық пен молшылық тілегім келеді», — деді Ш.Уәлиханов атындағы №12 гимназияның жетінші сынып оқушысы Інжу Мәлібек.
Челленджге № 12 қалалық гимназиядағы бірінші сыныптан сегізінші сыныпқа дейін 90 оқушы қатысты. Оқушылар мұқият дайындалып, белгілі күйлерді беріліп орындады. №205 жалпы білім беретін мектептен 20 оқушы қатыстып, өнерлерін көрсетті.
«Біздің мектепте балалар домбыраны жақсы көреді, үнемі музыкалық үйірмелерге қатысады. Өтіп жатқан челлендж жастарды патриоттық тұрғыда тәрбиелеуге зор үлес қосады. Бала домбырасын арқасына асып, музыка әлеміне терең бойлайды. Қанша уақыт өтсе де, ол оның құндылықтарына адал болады. Сондықтан елімізде күн сайын ата-аналар біздің дәстүрлеріміз бен мұраларымызға байланысты музыкалық аспаптың шынайы құндылығын көбірек түсінеді», — деді Ш. Уәлиханов атындағы №12 гимназия директоры Қуаныш Жұмабекұлы.
161-ші лицейдің оқушылары мектепке кірер жерде көшеде домбырада ойнады. Әдемі кестеленген көк қамзолдар жас домбырашылардың тамаша орындауы көрермендерді қуантты
