Петропавлда жедел уәкілдер аса ірі көлемде синтетикалық есірткі өткізді деген күдікпен жасөспірімді ұстады, деп хабарлайды Todayinfo.
Ұсталған кезде жігіттен ішінде ұнтақ тәрізді ақ түсті зат салынған және сатуға дайындап қойған 10 түйіншек тәркіленді. Тұрғылықты мекенжайынан есірткіні буып-түюге арналған материал табылды. Күдікті есірткіні әжесінің үйінде сақтаған. Немересінің әрекетінен әжесі бейхабар болып шықты. Сараптама нәтижесі тәркіленген 3 пакет есірткінің жалпы салмағы 191 грамм α-PvP синтетикалық есірткісі екенін көрсетті. Қолға түскен кезде күдікті 17 жаста болды. Қамауда отырғанда кәмелеттік жасқа толды.
Қылмыстық іс ҚР Қылмыстық кодексінің 297-бабы 3-бөлігі бойынша тергеліп жатыр. Ұсталған жігіт қашықтан есірткі таратумен айналысатын интернет-дүкендердің бірінде небәрі 3 айға жақын уақыт жұмыс істеп үлгерген. Тәжірибе көрсеткендей, есірткі таратушылардың жұмыс мерзімі осындай. Бұдан кейін олар қамауға алынып, сотталады. Жастардан жеңіл жолмен ақша табу туралы ұсыныстарға сенбеулерін сұраймыз. Аса ірі көлемде есірткі өткізу үшін 10 жылдан 15 жылға дейінгі мерзімге дейін бас бостандығынан айыру жазасы көзделгенін еске саламыз, – деді СҚО ПД есірткі қылмысына қарсы іс-қимыл басқармасының бастығы Руслан Сапаров.
Былтыр Солтүстік Қазақстан облысында есірткі таратқаны үшін кәмелеттік жасқа толмаған 2 жасөспірім сотталды.
