[Павлодар қаласында педагог қызметін тиісінше бақыламаған мектеп директоры тәртіптік жазаға тартылды.
Облыстық полиция департаментінің хабарлауынша, былтыр қазан айында 26 жастағы павлодарлықты полиция қызметкерлері психотроптық зат алып жүргені үшін ұстаған.
Полиция департаменті бастығының орынбасары Рашад Өтеуовтің айтуынша, күдікті ұсталған кезде оның жанында әйелі болған. Тергеу кезінде күдіктінің психотроптық заттарды пайдаланғаны және оның облыс орталығындағы мектептердің бірінде дене шынықтыру пәнінің мұғалімі болып жұмыс істегені анықталған. Осы оқиғаға байланысты тергеуші білім беру органдарына ұсыныс жолдады. Ол бойынша шешім қабылданды.
«Шешім бойынша дене шынықтыру мұғалімімен еңбек шарты бұзылды. Сонымен бірге педагог қызметін тиісінше бақыламағаны үшін мектеп директорына тәртіптік жаза қолданылды», – деді ол.
Облыстық департаменттің мәліметінен белгілі болғандай, білім мекемелеріне тек биыл ғана 604 ұсыныс жіберілген. Олар бойынша нақты шаралар қабылданған.
