Түркістан облысы Шардара ауданында жүгері дәнін терең өңдейтін зауыт құрылысы жүріп жатыр. Жобаны жүзеге асыру барысы жайында зауыт директоры Шухрат Курбанов айтып берді, деп хабарлайды Todayinfo.
«Бұл құрылыс 2023 жылы басталған. Зауыт Түркістан облысы Шардара ауданында орналасқан. Жылына 150 мың тонна жүгері дәнін өңдейді. Құрылыс негізі 3 кезеңге бөлінеді. Бірінші кезеңі 2023 жылы мамыр айында басталып, қыркүйек айында аяқталған. Бірінші кезеңге жүгері дәнін қабылдап, кептіріп, сақтайтын құбырлар кірді. Оның құрылысын аяқтап, іске қосып, былтыр шаруалардан дәнді дақылды қабылдадық. Биыл екі жылға созылатын екінші кезеңді бастап отырмыз. Оған негізгі зауыттың құрылысы, крахмал шығаратын цех, асхана, жатақхана, қоймалардың құрылысы кіреді. Зауыт 2025 жылдың қыркүйек айында алғашқы өнімді беруге тиіс. Жобаның жалпы құны – 35 миллиард теңге. Оның 1,5 миллиард теңгесі бірінші кезеңнің құрылысына жұмсалды. Қалғаны келесі кезең құрылыстарына жұмсалады», — деді «Казкрахмал» ЖШС директоры Шухрат Курбанов.
Болашақта зауыт өңделген жүгері дәнінен 26 түрлі өнімді жасап шығармақ.
