Фото: stan.kz
Ағымдағы жылдың басынан бері көкжөтелдің 82 жағдайы тіркелді, 100 мың тұрғынға шаққанда сырқаттанушылық көрсеткіші 12,5 құрады. 5 жасқа дейінгі балалар арасында 98,8% (81).
Облыста көкжөтелмен сырқаттанушылықтың өсуі жоспарлы вакцинацияны өткізіп алу және вакцинациядан бас тарту себебінен ұжымдық иммунитеттің төмендеуіне байланысты. 93% (76) жағдайда вакцинацияланбаған балалар сырқаттанды, оның ішінде вакцинадан бас тарту себебінен – 34, медициналық қарсы көрсетілімдер – 30, жасы жетпегендіктен егілмеген – 12.
«Көкжөтел – бұл ауыз қуысында, мұрында және көмейде өмір сүретін Bordetella pertussis бактериясынан туындайтын өте жұқпалы тыныс алу жолының ауруы. Ауру – адамнан адамға негізінен жөтелгенде немесе түшкіргенде ауа тамшылары арқылы оңай таралады. Ауыр, әлсірететін жөтел — көкжөтелдің негізгі белгілерінің бірі. Бұл өте жұқпалы бактериялық инфекция және тыныс алуды тоқтату қаупіне байланысты өмірдің бірінші жылындағы балалар үшін өте қауіпті»-, деп атап өтті Жетісу облысы СЭБД басшысы Асхат Сәкенұлы.
Өмірдің бірінші жылындағы вакцинацияланбаған балалар үшін жұқтырып алу қауіпі 100%. Инфекцияның ең белсенді берілу кезеңі – жөтел басталғанға дейін бірнеше күн, сондай-ақ осы симптом басталғаннан кейінгі алғашқы күндер. Көкжөтелдің тасымалдаушылары ерекше қауіп төндіреді – ауыр жөтел ұстамалары жоқ науқастар, олар ағзасында инфекцияның бар екенін білмеуі мүмкін. Әсіресе кім үшін қауіпті? Көкжөтел әсіресе бір жасқа дейінгі балалар үшін қауіпті. Нәрестелерде жөтел рефлексі әлі толық қалыптаспаған, сондықтан олардың жөтелген кезінде апноэ (тыныс алудың тоқтатуы) және тұншығу қаупі бар.
Клиникалық белгілері: көкжөтелдің инкубациялық кезеңі өте ұзақ болуы мүмкін-21 күнге дейін. Бұл инфекцияның алғашқы белгілері пайда болғанға дейінгі уақыт аралығы деп аталады. Көбінесе ол 7-10 күнге созылады. Аурудың бірнеше кезеңдері бар. Алдымен көкжөтелдің қарапайым ЖРВИ-ге өте ұқсас көріністері пайда болады. Бұл катаральды кезең деп аталады: науқаста мұрыннан су ағу, аздап тамақ ауруы, шаршау, жеңіл жөтел пайда болады. Бұл кезеңде көкжөтелді басқа респираторлық инфекциялардан ажырату қиын.
2-3 аптадан кейін қатты жөтел басталады, науқастың ұстамалар арасында тыныс алуы қиынға соғады. Кейде жөтел соншалықты күшті, ол құсумен бірге жүреді. Ұстамалар түнде күшеюі мүмкін. Жөтел сирек болған кезде сауығу кезеңі жүреді. Бірақ аурудан кейін ол өте ұзақ уақытқа, тіпті алты айға дейін созылуы мүмкін.
Асқынулар: Әсіресе, асқынулар балаларда жиі кездеседі: пневмония, конвульсиялар, энцефалопатия, мидың зақымдануы, тыныстың тоқтауы.
«Көкжөтелден қорғаудың ең тиімді жолы – вакцинация. Көкжөтелден барынша қорғау үшін балаларға 5 екпе алу қажет, оның ішінде 3 екпе – 2 айдан бастап 1 ай аралығымен, содан кейін бірінші ревакцинация бір жарым жаста, екінші ревакцинация – 6 жаста жүргізіледі»,- дейді Асхат Чарапиев.
Сондай-ақ, вакцинацияланған адамдарда да көкжөтелдің дамуы мүмкін екенін есте ұстаған жөн, бірақ ол әдетте жеңілірек болады. Сондықтан, көкжөтелге ұқсайтын белгілер пайда болған кезде, инфекцияның таралуын болдырмау, қажетті оқшаулау шараларын анықтап, ем тағайындау үшін дәрігерге қаралу қажет.
