Алматы облысы сүтті Сауд Арабиясына экспорттап, одан балмұздақ жасалмақ, деп хабарлайды Todayinfo.
«Shin-Line» және «Al-alameya Group» ірі компаниялары ынтымақтастық туралы меморандумға қол қойды. Оның аясында қазақстандық сүт Сауд Арабиясында өндірілетін балмұздақтың негізіне айналады. Қол қою рәсімі Алматы облысының әкімі Марат Сұлтанғазиевтің қатысуымен өтті.
Аймақ басшысы келісімнің екі тарап үшін маңыздылығына тоқталып, оның сәтті жүзеге асатынына сенім білдірді.
Қазақстандағы белгілі сүт өнімдерін өндіруші Shin-Line жоғары сапалы сүтті тұрақты жеткізуді қамтамасыз етеді.
«Бұл келісім біздің компанияның экспорттық әлеуетін дамытудағы маңызды қадам», — деп атап өтті «Шин-Лайн» компаниясының иесі Андрей Антонович Шин.
Осы ынтымақтастық аясында жасалған балмұздақтың алғашқы партиясы келесі жылы Сауд Арабиясының дүкен сөрелерінде пайда болады деп күтілуде. Сауд Арабиясының тамақ өнеркәсібінің көшбасшысы Al-alameya Group бірегей рецепт арқылы балмұздақ шығаратын болады.
«Біз қазақстандық серіктестермен ынтымақтасуға қуаныштымыз», — деді Al-alameya Group иесі Шауки Абдулсатар Абду Сыдық. «Таңдаулы қазақ сүтінен жасалған балмұздақ тұтынушылардың көңілінен шығатынына сенімдіміз», -деді Сауд Арабиясының өкілдері.
