Отарда әлімжеттік құрбаны болып, комаға түскен мерзімді сарбаз ауруханадан шықты, — деп хабарлайды Todayinfo агенттігі Tengrinews.kz-ке сілтеме жасап.
Dariger республикалық қоғамдық бірлестігінің басшысы Әйгерім Сейітованың айтуынша, дәрігерлер бар күш-жігерін салып, жігітті өлім аузынан аман алып қалған.
Еске сала кетсек, 19 жастағы Нұржігіт Асанұлы биыл 9 маусымда кома жағдайында Қордай ауданы бойынша орталық аудандық ауруханаға түскенде, оған полисегментарлы пневмония, 3-дәрежелі тыныс алу жеткіліксіздігі, 4-дәрежелі инфекциялық-уытты шок, сепсис және гипоксиялық ми ісінуі диагнозы қойылған болатын. Соның салдарынан ол өліп қала жаздаған.
«Клиникалық өлімнен кейінгі жағдай өте ауыр болып қалды. Сол кезде жағдай ауыр интоксикацияға, көп органның жеткіліксіздігіне байланысты болды. Клиникалық көріністе тыныс алу және бүйрек жеткіліксіздігі басым болды. Ол кезде пациент үздіксіз веноздық гемофильтрацияда, яғни гемодиализде және өкпені жасанды желдету аппаратында (ӨЖЖ) болған», — деді Әйгерім Сейітова.
17 маусымда сарбаз Алматы әскери-клиникалық госпиталіне ауыстырылды. Оның ата-анасы мәжілісмен Константин Авершиннен ұлын емдетуге көмек сұраған. Соның көмегімен республиканың үздік дәрігерлері процеске тартылды. Қазір жігіт өзін әлдеқайда жақсы сезінеді және бүгінде өздігінен қозғалады.
«Науқас алдымен реанимацияда болды. Содан кейін реанимациядан бөлімге ауыстырылды, онда ол шамамен бір апта болды. Қазір барлық көрсеткіш: қысым, жүрек соғу жиілігі қалыпты, қанықтылық өте жақсы. Науқаста пневмония болды, ол төмен қанықтылыққа байланысты желдеткіште болды. Қазір оның жағдайы жақсарды: сөйлеседі, өздігінен тамақтанады, өте жақсы ұйықтайды, көңіл-күйі жақсы. Болашақта ол учаскелік дәрігердің бақылауында болады. Пациентке емдеу және бақылау бойынша ұсыныстар берілді», — деп толықтырды Әйгерім Сейітова.
Сарбаздың анасы Жанна Жаналина барлық дәрігерге, сондай-ақ қиын сәтте қолдау көрсеткен қазақстандықтарға алғысын білдірді.
«Қазір ұлымның жағдайы өте жақсы. Біз оны емдеуге және қалпына келтіруге қатысқан, аяғына тұрғызған барлық дәрігерге қуана алғыс айтамыз. Шынымды айтсам, ол сауығып, аяғынан тұра алады деп үміттенген жоқпыз. Сондықтан біздің қуанышымыз шексіз. Барлығына рахмет!» — деді әйел.
Еске сала кетсек, сарбаздың анасы президент Қасым-Жомарт Тоқаевқа бейнеүндеу жасаған болатын. Кейін президенттің кеңесшісі-баспасөз хатшысы Берік Уәли жеке парақшасында президенттің әлеуметтік желілерде жарияланған мерзімді сарбаздың анасының үндеуімен танысқанын жазды. Мемлекет басшысы Қорғаныс министрінің назарын армиядағы мұндай оқиғаларға жол бермеуге аударды және тергеуді бақылауға алуды тапсырды.
