Мемлекет басшысының заңсыз құмар ойындармен байланысты қауіп-қатерлерді бейтараптандыру туралы тапсырмасын орындау мақсатында Қаржылық мониторинг агенттігі бастамасымен ведомствоаралық кездесу өткізіліп, заңсыз онлайн құмар ойындарға және лудоманияға қарсы күрес мәселелері талқыланды.
ҚМА төрағасы Дмитрий Малахов жиынды аша отырып, құмар ойындар мен лотерея қызметін реттеуге бағытталған бірқатар шараның қолданыстағы заңнамада қарастырылғанын атап өтті. Алайда, заңсыз онлайн құмар ойындар әлі де қоғамымыз үшін маңызды мәселе болып қалып отыр.
Біз бірлесіп, бұл мәселені шешу жолдарын талқылау үшін жиналдық. Бұл қоғам мен мемлекет үшін өте маңызды және біз бұл салада шұғыл әрекет етуіміз қажет, – деді Малахов.
Өткен жылы ҚМА Мәдениет және ақпарат министрлігімен бірлесіп, TikTok-та жаппай карта ойындарын ұйымдастырудың алдын алды. 300-ден астам ұйымдастырушы аккаунты анықталып, құқыққа қайшы контенттің эфирін жедел түрде бұғаттауға мүмкіндік беретін жасанды интеллект енгізді. Қазіргі уақытта Instagram-дағы заңсыз лотереяларды ұйымдастырушыларға қарсы жұмыс жүргізіліп жатыр.
Агенттік осы әрекеттерге қатысы бар адамдарды жауапкершілікке тартуға қатаң бағытталған. ҚМА азаматтарды заңсыз лотереяларға тартатын адамдарды анықтауда Мәдениет және спорт министрлігіне көмек көрсетуге, сондай-ақ, төленбеген салықтарды қосымша есептеу үшін Мемлекеттік кірістер комитетіне ақпарат ұсынуға дайын.
Оған қоса, онлайн-казиноларға қарсы күрес бойынша ауқымды жүйелі жұмыс жүргізіліп жатыр. Биылғы жылдың басынан бастап 6 мыңнан астам осындай сайт бұғатталып, көшірмелері тәулік ішінде жойылды. Заңсыз онлайн-құмар ойындарға қарсы күресте олардың қаржылық операцияларын тоқтату маңызды мәселе саналады.
Шетелдік ұйымдастырушылар қазақстандық ойыншылардан тікелей ақша қабылдай алмайды. Сондықтан олар жергілікті төлем ұйымдары мен банктерді пайдаланады. Алайда, құмар ойындар туралы жаңа заң күшіне енгеннен кейін, интернет-казиноға жасалатын транзакциялар шектеледі. Ал банктер мен төлем ұйымдары көмек көрсеткені үшін жауапкершілікке тартылады.
Бұл мәселе бойынша ҚМА, Мәдениет және спорт министрлігі мен Ұлттық банк бірлесіп жұмыс істеп, заңсыз ақша аударымдарын анықтап, бұғаттауды жүзеге асырады. Жиын соңында қатысушылар құмар ойындарға патологиялық тәуелділіктен жас ұрпақты қорғауға бағытталған шаралар мен іс-қимыл алгоритімін қамтитын ынтымақтастық туралы меморандумға қол қойды.
