Таразда кірістер басқармасы 1,9 млрд теңге артық төленген салықты қайтарудан негізсіз бас тартқан, деп хабарлайды Todayinfo.
Прокуратураның мәліметінше, облыстағы ірі инвестор «Казфосфат» ЖШС-ға табиғатқа эмиссия салығын артық төлеген.
— Қауіпті және қауіпті емес қалдықтарды көму үшін жергілікті атқарушы органдар тарифтік мөлшерлемені бекітеді. Алайда Тараз қаласында мөлшерлеме бекітілмей, серіктестіктен 2022 жылдың 1 қаңтары мен 2023 жылдың 9 ақпаны аралығында төлемдер тұрақты түрде алынып отырған. Кейін анықталғандай, төлемдер нормадан асып, кәсіпорын 1,9 млрд теңгені артық төлеген, – делінген прокуратура хабарламасында.
Тараз қаласы бойынша мемлекеттік кірістер басқармасы инвесторға салықтың тиісті түрі бойынша алдыңғы төлемдерге артық төленген қаржыны қайтарудан және есепке алудан негізсіз және бірнеше рет бас тартқан.
— Прокурорлық ден қою актісі бойынша инвестордың болашақ төлемдеріне артық төленген 1,9 млрд теңгесі есепке алынып, кінәлі лауазымды адам тәртіптік жауапкершілікке тартылды, – делінген хабарламада.
Сонымен бірге қазір облыста эмиссия үшін 3 млрд теңгеден астам қаржыны екі есе артық төлеген 45 кәсіпкер анықталды. Осы фактілердің барлығы бойынша прокурорлық қадағалау актілері енгізілді.
