Алматы облысында тұратын Лейла Амринаның үйі құлаудың алдында тұр. Көктемде жер сілкінгеннен кейін қатты көшкін жүріп, үй қабырғасы жарылып кеткен. Редакциядан көмек сұраған әйелдің сөзінше, үйі кез келген сәтте құлап қалуы мүмкін. Тұрғын облыс әкімдігінен өтемақы алу үшін сотқа да жүгінген, деп хабарлайды Todayinfo.
Алайда, айтуынша, талап-арызы ескерілмеген. Үй Талғар ауданындағы «Апорт» бау-бақшасының маңында орналасқан. 2008 жылы салынған бір қабатты кірпіш үйдің құжаттары түгел. Лейланың сөзінше, 4 наурызда жер сілкінгенде жер 1,5 метрге төмен түсіп кеткен. Содан қоршау жарылған. Бірақ үй сол кезде бүтін болғандықтан, үй иесі ешқайда жүгінбей, қоршау мәселесін күн жылығанда шешем деп ойлаған. Алайда бірнеше апта өткен соң үй қабырғасында үлкен жарықтар пайда болыпты.
«19-20 наурызда үйім құлай бастады. Жер төмен қарай опырылғандықтан, үй сол жаққа қарай қисая бастады. Тіреп тұрған баған ажырап қалды. Менің қателігім – ТЖ қызметкерлерін шақырмағаным. Өйткені, интернетте мұндай жағдайда әкімдікке жүгіну керек деп жазылған. Мен үйіндінің астында қалсам ғана құтқарушыларға хабарласу керек деп ойладым. Бірақ үйінді астында қалмағаныммен, үйімнің залы қирап, кірпіштер құлап, әйнектер жарылып жатты. Мен сықырлаған дауыстан оянып кеттім. Кейін жиһаздар мен ыдыс-аяқтарды сыртқа шығара бастадым. Жиһаздарым әлі басқа бөлмелерде, далада тұр. Содан кейін әкімдікті шақырдым. Біз сараптама жүргізіп, шығынның 8 млн теңгені екенін анықтадық», — дейді Лейла Амрина.
Осыдан соң үйдің қирауы уақытша тоқтаған. Бірақ топырақ жылжыған соң, қабырғалар одан әрі жарыла бастапты. Мамандардың сөзінше, іргетасты қалпына келтіру керек.
«Үй апатты деп танылды, себебі үйдің жертөле бар жағы ғана бүтін тұр. 30 шаршы метр болатын зал мен тағы бір бөлме жарылып кеткен. Мен сотқа арыз бердім. Бәрі жердің опырылғанына көз жеткізді. Бірақ талап-арыз қанағаттандырылмады, себебі Талғар ауданында төтенше жағдай режимі жарияланбаған. Төрт ай бойы соттасып келемін. Бүкіл ақшам сараптама мен адвокатқа кетті. Үйге әзірге ештеңе істеген жоқпын. Қазір біз бүтіндеу жағында тұрып жатырмыз. Енді қысқа дейін бірдеңе істеу керек», — деді ол.
Визуалды тексеру актісінде үйлер салынған жер тегістелген тау баурайы екені анықталған. Бұл жердің топырағы тез шөгіп, су жылдам шаятын көрінеді. Жер сілкінгенде көрші монша мен үй арасында шұңқыр пайда болған. Осы шұңқырдағы пластик су құбыры сынып, топырақ ылғалданып кеткен. Салдарынан моншаның да іргетасы жарылыпты. Сараптамада іргетастың ылғал топырақтан жарылғаны айтылған.
«Жарықтардың пайда болуына табиғи сипаттағы жер сілкінісі себеп. Қабырғадағы жарықтардың және қабырғаның бір бөлігінің құлау себебі іргетастардың шөгуі», — делінген қорытындыда.
Алматы облысы әкімдігі наурызда мүлікке келген залалды өтеу туралы өтініш түскенін растады. 26 наурызда әкімдік қызметкерлері тексеріс жүргізіп, акт толтырған.
«Тексеру кезінде өтініштің зардап шеккен мүлік иесінен емес, көрші жер иесінен берілгені анықталды. Өтініш үй құлағасын үш апта өткен соң берілген. Өтініш беруші мұның жер сілкінгенде құлағанын айтады. Көрші жерде шаруашылық нысан, яғни монша бары анықталды. Моншаның іргетасы оны дұрыс қолданбаудан, топырақтың шөгуінен болған. Яғни орталық кәріз жүйесі болмағандықтан, су ағызу ережелері бұзылуы мүмкін», — деп хабарлады әкімдік өкілдері.
Әкімдік құлаудың нақты себептерін анықтау үшін тәуелсіз сараптама жүргізуді ұсынды. Қажет болған жағдайда сотқа талап-арыз беру керек деді.
«Бесағаш ауылдық округі мен Талғар ауданы әкімдіктеріне залалды өтеу туралы талап-арызды Амрина Л.К. берген. Сот шешімімен талап арыз қанағаттандырылмады», — деп атап өтті Алматы облысы әкімдігінің баспасөз қызметі.
Фото: Жеке мұрағаттан
