Ұйғыр ауданының жастары дауыс беруге шығармашылық тұрғыда қарап, азаматтық белсенділік танытты. Шонжы ауылындағы алаңға қыз-жігіттер ұлттық киіммен келіп, мерекелік көңіл-күй сыйлады, деп хабарлайды Todayinfo.
Олардың киім таңдауының өзіндік сыры бар. Осылайша жастар Қазақстан халқының бірлігі мен алуан түрлілігін, әрбір азаматтың ел өміріне қатысуының маңыздылығын көрсеткісі келді. Олардың айтуынша, ұлттық киімдер еліміздің бай тарихы мен мәдениетін бейнелейді.
«Жастардың жалт-ұлт еткен қызылды-жасылды киімде келуі нағыз мерекелік көңіл-күйді тудырды. Айналасындағылар оларды жылы шыраймен қарсы алды. Жастардың басты мақсаты – өзгелерді ел өміріне араласуға тартып, әрбір дауыстың маңызды екенін көрсету болды. Жарқын киім мен жақсы әсер дауыс беру үшін келгендердің барлығына ұмытылмас сәт сыйлады», — деп хабарлады Алматы облысы әкімінің баспасөз қызметі,
Дауыс беру учаскесіне UFC күрескерінің қарындасы Сора Рахмонова, күйеуі Нурсултан Орынбасаровпен бірге келді. Сора — аралас жекпе-жектен чемпион және қазақстандық әйелдердің арасында қоян-қолтық ұрыстан үш дүркін әлем чемпионы. Оның жұбайы — облыстық мәслихаттың депутаты әрі грэпплингтен Азия чемпионы. Спортшылар дауыс беру арқылы еліміздің абыройын тек рингте ғана емес, сондай-ақ оның дамуына белсене қатысу арқылы да қорғап жатқандарын көрсетті.
Екі спортшы да референдумға қатысуды міндеті деп есептейді және әр дауыс өңірдің болашағы үшін маңызды екенін айтады. Сонымен қатар, референдумға осындай танымал спортшылардың қатысуы басқа адамдарды, әсіресе жастарды, азаматтық белсенділікке ынталандырады. Адамдардың бірге болашаққа таңдау жасауы командалық рухты көтереді, спортта да жеңіске жетуге жетелейді.
