Түркістан облысының әкімі Дархан Сатыбалдының тапсырмасымен өңірдің туристік нысандарының ақпаратын жаңарту және әдістемесін дайындау мақсатында бірыңғай ақпаратты ұсынатын әдістемелік құралдары әзірленуде. Онда туристік нысандар бойынша фактілер, аңыздар және қызықты оқиғалар тізбегі қамтылады, — деп хабарлайды todayinfo.kz ақпараттық порталы.
Туристік нысандар бойынша жинақталған ақпараттарды археолог, тарихшы, архитектор, өлкетанушы, лингвист және басқа да білікті мамандармен бірге талдау жұмыстары жүргізіледі. Жинақталған ақпараттарды қазақ, орыс, ағылшын, түрік, қытай, араб, жапон тілдеріне аудару жұмыстары жүргізіліп, бірыңғай туристік ақпарат құралына енгізіледі,- деп хабарлады Түркістан облысы әкімдігінің баспасөз қызметі.
Айта кетейік, Түркістан қаласы облыс орталығы ретінде құрылғанынан бастап өңірде туризмді дамыту үшін ауқымды жұмыстар жүргізіліп жатыр. Ресми статистикалық деректерге сүйенсек, 2019 жылы облысқа келген туристердің саны -174,4 мың адам болса, 2023 жылдың қорытындысы бойынша бұл көрсеткіш 562,8 мыңды құрап отыр. Бүгінгі таңда, Түркістан облысы бойынша туристерді орналастыратын 224 объект (орналастыру орындары) жұмыс істейді. Бұл көрсеткіш 2019 жылы 164 болған. Бұл ретте, аталған саладағы прогресс жаңа орталықтардың құрылысына, кәсіпкерлікке қолдау көрсетуге және қызмет көрсету мәдениетін көтеруге бағытталған жобаларға байланысты оң нәтиже беруде. Мейрамханалар, қонақ үйлердегі қызметтер біртіндеп жақсарып келеді. Сонымен қатар, өңірдегі танымал туристік нысандарын дамытуға бағытталған әлеуеті жоғары 10 туристік нысан таңдалып алынды. Олар: Сауран қалашығы; Отырар қалашығы; Ақмешіт үңгірі; Тұттыбұлақ сарқырамасы; «Сайрам-Өгем» мемлекеттік ұлттық табиғи паркі; Ақсу шатқалы; Сарыағаш шипажай орталығы; «Жібек жолы» бақылау өткізу бекеті; Түркістан қаласы және «Хантағы» аумағы.
Жоспар бойынша нысандарға кіреберіс жолдарын жөндеу, төлқұжаттар мен жол сілтегіштер орнату, нысандарды дамыту эскиздік жобаларын әзірлеу, тарихи нысандардың тақырыптық экспозиялық жоспарларын дайындау және кіру формаларға үлгі бекіту қарастырылған. Сондай-ақ, туристік соқпақтар әзірлеу, нысандар маңында модульдік ақпараттық киоск пен визит-орталықтар орналастыру, аумақтарда сервис нысандарын салу бойынша инвесторлар тарту, кейбір нысандарға кіру ақысын бекіту шаралары қамтылған. Бұдан бөлек, Түркістан қаласында этноауылды, Күлтөбе қалашығын, Қолөнершілер орталығы, City Tour, Лазерлік шоу жобаларын жүзеге асыру көзделген.
