Президент Қасым-Жомарт Тоқаев Қазақстан Республикасының Абай атындағы әдебиет пен өнер саласындағы 2024 жылғы мемлекеттік сыйлығын беру туралы Жарлыққа қол қойды. Онда түркістандық жазушы Ергөбек Құлбек Сәрсенұлына – «Адамның бір қызығы бала деген» кітабы үшін Абай атындағы әдебиет пен өнер саласындағы 2024 жылғы мемлекеттік сыйлық иегері атанды, — деп хабарлайды Todayinfo.kz ақпараттық порталы.
Құлбек Ергөбек – 1952 жылы, 26 желтоқсанда Түркістан облысы, Отырар ауданында туған. ҚазМУ-ды 1975 жылы «Қазақ тілі мен әдебиеті» мамандығы бойынша бітірген. ҚР Ұлттық Ғылым академиясы, М.Әуезов атындағы Әдебиет және өнер институтында және Республикалық халық шығармашылығы үйінде зертханашы, аға ғылыми қызметкер, бөлім меңгерушісі, «С.Мұқанов мемориальдық музей-үйінде» әдіскер, ғылым бөлімінің басшысы, республикалық газет-журналдарда бөлім меңгерушісі, редактор, бас редактор болған. Қ.А.Ясауи атындағы халықаралық қазақ-түрік университетінде доцент, профессор ретінде еңбек сіңіріп, «Қазақ әдебиеті», «Түрік халықтары әдебиеті» кафедрасының меңгерушісі, декан, вице-президент, 1-вице-президент болып білім саласына да үлес қосып, шәкіртер тәрбиелеген. Филология ғылымдарының докторы, түрколог-ғалым, Халықаралық академиялардың мүшесі. Ұзақ жылдан бері ел руханиятының дамуына үлес қосып келеді.
Бұдан бөлек елдің әлеуметтік-экономикалық және мәдени дамуына, халықтар арасындағы достық пен ынтымақты нығайтуға қосқан елеулі үлесі мен белсенді қоғамдық қызметі үшін бір топ азамат мемлекеттік наградалармен марапатталған. Ақорда хабарламасында жалпы биылғы мемлекеттік наградаларды тағайындауда қарапайым жұмысшылардың мәртебесін асыруға, еңбек әулеттерінің қоғамдағы абырой-беделін арттыруға айрықша мән берілгені айтылады.
Марапат иелерінің қатарында 450-ден астам жұмысшы, 137 педагог, 80-нен аса ғалым, 100-ге жуық құтқарушы мен ерікті бар. Олардың қатарында Түркістан өңірінің тумалары да бар. Атап айтсақ, айтулы ақын, драматург, аудармашы, сазгер Исраил Сапарбай «Қазақстанның халық жазушысы» атағына ие болды. Сонымен қатар, мемлекет және қоғам қайраткері, актер, эстрада әншісі Нұрлан Өнербаевқа І дәрежелі «Барыс» ордені табысталды.
Қазақстан Республикасының өркендеуі мен дамуына елеулі үлес қосқан үлесі үшін Түркістан облысының әкімі Дархан Сатыбалды «Парасат» орденінің иегері атанса, әдебиет зерттеушісі, филология ғылымының докторы, профессор Құлбек Ергөбек «Адамның бір қызығы бала деген» кітабы үшін Қазақстан Республикасының Абай атындағы әдебиет пен өнер саласындағы 2024 жылғы мемлекеттік сыйлығына ие болды. Сондай-ақ, Премьер-министрдің орынбасары Тамара Дүйсенова ІІІ дәрежелі «Барыс» орденін кеудесіне тақты.
