Түркістан қаласының мәдени-рухани орталығында көптен күткен «TURKISTAN Sky auto fest – 2024» іс-шарасы басталып, қала тұрғындары мен туристерге ерекше көңіл-күй сыйлауда. Бұл фестиваль Түркістан қаласының туристік тартымдылығын арттыруға және мәдени әлеуетін насихаттауға бағытталған. Қала қонақтары мен тұрғындарына түрлі қызықты іс-шаралар мен көріністер дайындалып, олардың есте қаларлық әсер алуы үшін бар жағдай жасалды.
«TURKISTAN Sky auto fest – 2024» аясында көрермендер үшін бірнеше керемет шаралар ұйымдастырылды. Алдымен, ерекше автокөліктер көрмесі көпшіліктің қызығушылығын арттырды. Авто фест аясында 200-ге жуық ретро және тюнингтелген автокөліктердің эксклюзивті модельдері қойылып, әрқайсысы өзінше бір ерекше стиль мен дәуірді бейнеледі. Қатысушылар мен қонақтар әртүрлі дәуірлердегі және стильдердегі көліктерді тамашалап, олардың тарихына үңіліп, авто индустрияның даму жолымен танысты. Автокөліктер көрмесі аясында автошоулар, қызықты байқаулар мен жарыстар ұйымдастырылды. Көрмеде тек көліктерді көру ғана емес, сонымен қатар, автокөліктердің дизайны, аудиожүйесі және тюнинг жұмыстары бойынша арнайы байқаулар да өтті. Қатысушылар арасында ең үздік көлік иелері анықталып, оларды марапаттау рәсімі көрермендердің ерекше ықыласын тудырды. Байқауларға қонақтар да қатысып, автокөлік әлеміндегі таңғажайыптарды тамашалауға мүмкіндік алды.
Фестивальдің тағы бір тартымды бөлімі әуе шарларын ұшыру шоуы болды. Бұл көрініс көптеген көрермендердің назарын аударып, аспанға көтерілген түрлі түсті әуе шарлары ерекше атмосфера тудырды. Әуе шарларының аспанда қалықтауы Түркістан аспанын керемет безендіріп, қонақтардың көңілінен шықты. Шарлар шоуына қатысушылар тек көрермен ретінде ғана емес, әуе шарының көмегімен ұшу мүмкіндігіне де ие болды. Бұл ұмытылмас әсер сыйлайтын және ерекше эмоцияларға толы сәт болды. Сондай-ақ, параплан және дельтаплан көмегімен ұйымдастырылған әсерлі түтіндер шоуы фестивальді тіпті әсерлі етті. Көңіл көтеру мақсатындағы бұл көріністер Түркістанның аспанын түрлі түстерге бояп, көптеген адамның жүрегінде жарқын естелік қалдырды.
Фестиваль аясында қолөнершілер де өз өнерлерін көрсетті. Керамика, ағаш және былғарыдан ұлттық бұйымдар жасау, кілем тоқу, қыш құмыралар дайындау бойынша интерактивті сабақтар ұйымдастырылды. Қолөнершілер шеберлік сабақтарында көрермендерге дәстүрлі өнердің сырларын ашып, олардың қатысуымен интерактивті түрде ұлттық бұйымдарды жасау үрдісін көрсетті. Әрбір қатысушы ұлттық нақыштағы бұйымдарды өз қолымен жасап көруге мүмкіндік алды. Бұл қонақтарға қазақтың мәдени мұрасымен жақынырақ танысуға мүмкіндік берді және ұлттық өнерге деген қызығушылықтарын арттырды.
Тағамдар көрмесі фестивальдің тағы бір ерекшелігі болды. Түркістан қаласының жергілікті дәмханалары мен мейрамханалары өздерінің ең танымал тағамдарын ұсынып, ерекше мәзірлерін көрсетті. Әркім өз талғамына сай ұлттық және заманауи тағамдарды дәм татуға мүмкіндік алды. Сонымен қатар, шебер аспаздар тағам дайындаудан арнайы мастер-класстар өткізіп, өздерінің құпия рецепттерімен бөлісті. Бұл гастрономиялық шоу қонақтардың тағам дайындауға қызығушылығын оятып, фестивальдің әсерлі бөліктерінің біріне айналды.
Іс-шараның тағы бір ерекше бөлімі – аниматорлар мен акробаттардың көрсетілімдері болды. Олардың өнерлері фестивальді көріктендіріп, келушілердің назарын аударды. От шоуы, акробаттық өнерлер және арнайы ұйымдастырылған викториналар мен түрлі ойындар қонақтардың көңілін көтеріп, фестивальге ерекше сән берді. Жас пен кәріге бірдей қызықты болған бұл ойындар адамдарға жағымды эмоциялар сыйлап, бір-бірімен жақсы тіл табысуға мүмкіндік берді.
Фестиваль соңында көрермендерді концерттік бағдарлама күтті. Сахнада танымал DJ Shami, DJ Macarella және хедлайнер Adil өнер көрсетті. Олардың музыкалық қойылымдары жастар мен ересектерге бірдей ұнап, жиналған қауым үлкен қызығушылықпен тыңдады. Фестиваль атмосферасын жандандыруға атсалысқан әрбір өнер иесі қонақтарды қуантты. Олардың өнерлері көпшіліктің көңілінен шығып, ерекше сергектік пен қуаныш сезімін тудырды.
«TURKISTAN Sky auto fest – 2024» фестивалі екі күнге жоспарланғандықтан, алғашқы күнде көптеген әсерлі сәттер орын алды. Келесі күнде де дәл осындай қызықты бағдарламалар, ерекше көріністер және естен кетпес әсерлер күтуде. Түркістанның мәдени-рухани орталығы бұл шара арқылы еліміздің туристік тартымдылығын арттыруда үлкен рөл атқарып келеді. Мұндай іс-шаралар арқылы қала тұрғындары мен қонақтары үшін ерекше мерекелік атмосфера қалыптасып, Түркістанның танымалдылығы артуда.
