Алматы, Қазақстан (20 қараша 2024) — Қазақстандық боксшы Данияр Елеусінов жартылай орта салмақтағы WBC чемпионы Марио Барриосты жекпе-жекке шақырды.
Елеусінов Instagram парақшасында Барриосқа «Өткен демалыс күндері WBC чемпионы Марио Барриос өте әлсіз өнер көрсетті. Оның қолынан Абель Рамосты екінші раундтың ортасында нокдаунға түсіру ғана келді. Марио, мен сені жеңетініме сенімдімін. Кез келген жерде, кез келген уақытта жекпе-жекке шығайық» деп жазды.
Еске сала кетейік, Елеусінов соңғы рет рингке биыл қыркүйекте шығып, филиппиндік Джо Нойнайды 5-раундта жеңіп, WBC Peace чемпионы атағын иеленген болатын.
