Алматы облысының полиция департаменті Шерзат Болаттың ағасының өліміне байланысты сот-медициналық сараптаманың алдын ала нәтижелерін жариялады, деп хабарлайды Todayinfo.kz.
Алдын ала мәліметтерге сәйкес, 9 желтоқсан күні Талғар маңында денесі табылған 30 жастағы ер адам механикалық асфиксия салдарынан қайтыс болған. Бұл жағдай, сарапшылардың пікірінше, өзін-өзі асу жағдайында орын алады. Марқұмның денесінде зорлық-зомбылық белгілері байқалмаған.
— Сарапшылар мойында анықталған таңбалардың, соның ішінде қылқындыру іздері мен мойын аймағындағы сызаттардың тұзақ қолданылған кезде пайда болатын жарақаттарға сәйкес келетінін атап өтті. Барлық белгілер суицидке меңзейді, себебі жарақаттардың сипаты мен іздердің біркелкі болмауы осындай жағдайларда жиі кездеседі, — делінген баспасөз хабарламасында.
Фото Алматы облысы ПД баспасөз қызметі
Сонымен қатар, сарапшылардың түсіндіруінше, «құлақ маңындағы сүйек аймағы мен желке тұсындағы сызат тәрізді жаралар тұзақтың қажалуынан және қысуынан пайда болуы мүмкін».
Құқық қорғау органдары қазіргі уақытта оқиғаның барлық мән-жайын анықтау жұмыстарын жалғастыруда. Ведомство азаматтарды тек ресми ақпарат көздеріне сенуге шақырып, жалған мәлімет тарату қылмыстық жауапкершілікке әкеп соғатынын ескертті.
Еске салсақ, Каржаубай Нұрымовтың отбасында қайғылы оқиғалар тізбегі 4 қазанға қараған түні басталған еді. Сол кезде топ болып шабуыл жасаған жігіттер оның 16 жастағы ұлы Шерзат Болатты өлімші етіп соққыға жыққан болатын.
Бұл қылмысқа күдікті ретінде 11 адам ұсталып, қамауға алынды. ҚР Ішкі істер министрі Ержан Сәденов бұл істі өз бақылауына алды. Талғарға министрліктің арнайы тобы жіберілген болатын.
Бірнеше күн өткен соң, 12 қазанға қараған түні Азат ауылында Шерзат Болаттың отбасы тұратын үйге өрт қойылды. Бас прокуратура кінәлілерді табуға уәде бергенімен, осы күнге дейін кінәлілер анықталған жоқ.
9 желтоқсан күні Шерзат Болаттың ағасының денесі табылды. Алдын ала ақпарат бойынша, ер адам өзіне қол жұмсаған, артынан өлім алдындағы хат қалдырған.
Сонымен қатар, сейсенбі күні Алматы облысы полиция департаментінің баспасөз қызметі Талғардағы Шерзат Болаттың әкесінің ұсталғанын хабарлады.
