Әлеуметтік желіге кіру ережесі қатаңдатылды
Түркия 2025 жылдан бастап 16 жасқа толмаған жасөспірімдердің әлеуметтік желіні пайдалануы үшін ата-аналарының немесе қамқоршыларының жазбаша келісімін талап ететін жаңа ережені енгізді. Бұл шешім балалардың психикалық денсаулығын қорғау, кибербуллинг пен зиянды контенттің әсерінен сақтандыру мақсатында қабылданды.
Балаларды қорғау және тәрбиелеуге басымдық
Түркияның Көлік және инфрақұрылым министрі Абдулкадир Уралоглу мәлімдегендей, жаңа ереже жастардың саналы дамуына ықпал етеді.
«16 жасқа дейінгі балаларымыз білім мен дамуға көбірек көңіл бөлуі тиіс. Бұл жас санатына шектеу қою арқылы оларды қауіпсіз ортада тәрбиелеуді көздейміз,» – деді министр.
Әлемдік тәжірибеге сүйенген шешім
Жаңа талаптар психология саласындағы сарапшылардың ұсыныстары мен басқа елдердің тәжірибесіне негізделген. Көптеген елдерде әлеуметтік желіге кіру жасы 13 пен 16 жас аралығында шектеледі. Түркия осы бағыттағы шараларды күшейтіп, жас пайдаланушыларды қорғау механизмдерін енгізуді қолға алды.
Әлеуметтік платформаларға қойылған талаптар
Жаңа заңға сәйкес, әлеуметтік медиа платформаларына жасты тексеру және ата-ананың келісімін растау үшін арнайы технологиялар енгізу міндеттеледі. Егер компаниялар бұл талаптарды бұзса, айыппұл салынады.
PS
Түркия үкіметінің бұл бастамасы гаджеттерге тәуелділікті азайтып, жасөспірімдерді оффлайн өмірге белсенді араласуға ынталандыруға бағытталған. Әлеуметтік желілердің ықпалын шектеу арқылы, мемлекет балалардың психикалық және физикалық денсаулығын жақсартуды көздейді.
