Фото: istockphoto.com
Ресейдің Краснояр өлкесінде өткен жылы дихлофоспен улану салдарынан төрт баласынан айырылған отбасы тағы да қайғылы жағдайға тап болды. Бұл жолы олардың үш айлық нәрестесі қайтыс болды, деп хабарлайды Тodayinfo ақпараттық порталы.
Сәби өз бесігінде өлі күйінде табылған
SHOT Telegram арнасының мәліметінше, сәби өз бесігінде өлі күйінде табылған. Алдын ала болжам бойынша, өлімге құсудан туындаған механикалық асфиксия себеп болған.
Бала емшек сүтімен қоректенген және денсаулығына байланысты медициналық есепте тұрмаған. Қазір прокуратура қайғылы оқиғаға байланысты тексеру жүргізіп жатыр.
Отбасының басынан өткен алғашқы трагедия
Қайғылы оқиға алғаш рет 2023 жылдың 20 қыркүйегінде болды. Ол кезде 6, 11, 12 және 13 жастағы төрт бала белгісіз заттан уланып, ауруханада көз жұмған. Ал олардың жүкті анасы мен әкесі ауруханаға жеткізілгенімен, аман қалған.
Тергеу барысында балалардың жергілікті дүкеннен сатып алынған тұшпара мен тауық етінен уланғаны туралы болжам жасалған. Алайда сараптама бұл нұсқаны теріске шығарды. Кейіннен уланудың нақты себебі анықталды: отбасының әкесі «Варан» дихлофосын үйдің барлық бөлмелеріне шашқан, бірақ желдетуді дұрыс жүргізбеген – тек кішкентай терезені ашқан.
Осы жағдайдан кейін отағасына абайсызда адам өліміне себепкер болды деген айып тағылды.
Тірі қалған 32 жастағы Виктория бесінші баласын дүниеге әкелгеннен кейін, отбасымен бірге бұрынғы үйлерінен уақытша көшіп, жөндеу жұмыстарын жүргізген. Алайда жаңа туған сәби де ұзақ өмір сүрмеді.
