Қазақстанның Халық жазушысы Мұхтар Мағауиннің соңғы сұхбаты журналист Жанар Байсеміздің YouTube арнасында жарық көрді. Онда жазушы қазақтың салт-дәстүрін аяққа таптайтын әсіредіншілдік аямай сынады, деп хабарлайды Todayinfo.
«Дін – қазақтың өміріндегі ең басты мәселе емес. Қазақ бұрын дінсіз болды, мұсылманшылық күшейді деп қуанып едік, бұл тек зиянға шықты. Салафиттер шықты, басқа жат ағымдар шықты. Бұлар қазақтың руханиятын, тұрмысын теріске шығарды. Зират салмау керек, Құран оқымау керек, жетісін бермеу керек, қырқын бермеу керек деген не деген сұмдық?! Ең аяғы келін үлкендерге сәлем салмау керек, Аллаға ғана тәжім ету керек екен. Дін — апиын деген. Ол сөздің мәнісін жұрт кезінде ұққан жоқ. Апиын аз ғана болса — пайдалы, көп болса, ол — наркотик. Дін де сол сияқты. Әсіредіншілдікті қазақ ешқашан қолдаған жоқ. Абайдан бастап, Сұлтанмұхмұттар кезінде дінге қарсылық болды. Ұлт қаймақтары қазақ дінге беріліп кетті деп уайымдады. Дін – соқырлық деді, әрине дін керек, бірақ ол фанатик болып кету деген сөз емес. Ол қазақты теріске шығару деген сөз емес. Қазақтың дәстүр-салтына қарсылық деген, ол –сұмдық нәрсе», — деді Мұхтар Мағауин.
Халық жазушысы адамның Құдайға сенімі сыртқы атрибутикамен емес, ішкі сезіммен жтекізілуі керек дейді. Ол қазақ әйелдерінің хиджап кигені де қазақтың құндылыған жат дүние деп есептеген.
«Дін деген жүректе болу керек. Мен намаз оқымаймын, Абай атам да намаз оқымаған. Қазіргі әйелдердің хиджаб кигені ұлттың құндылығына қайшы нәрсе. Мен өзімді мұсылманмын деп санаймын, бұрынғы Тәңірді де жоққа шығармаймын. Ата-бабамыз сонымен келді ғой. Әруаққа сену – ол исламға қайшы емес. Әруақ жоқ болса, қазақ та жоқ. Әруақ деген қазақтың рухы. Рухтың жөні бөлек», — деді ол.
Еске ссалайық, Қазақстанның Халық жазушысы, мемлекеттік сыйлықтың лауреаты Мұхтар Мағауин биыл 10 қаңтарда АҚШ-тың Мерилэнд штатында 85 жасында дүниеден өтті.
