Қазақстандық белгілі ауыр атлет Алмас Өтешов ішімдіктен емделгеннен кейінгі өмірі мен қазіргі жағдайы туралы «Уақыт көрсетеді» подкастында ашық әңгімеледі. Спортшы елге қызмет етіп, өзінің мол тәжірибесін жастармен бөлісуді армандайтынын айтты, деп хабарлайды Тodayinfo ақпараттық порталы.
«Еліме қызмет еткім келеді»
«Өз саламда жұмыс істегім келеді. Көп нәрседен емделу барысында қол үзіп қалдым. Спорт және мәдениет министрі Ербол Мырзабосыновтан көмек сұраймын. Маған жұмыс берсе, жастарға спорт саласында білім беруге әзірмін. Сол ішімдіктің кесірінен көп дүниеден айырылдым», – деді Алмас Өтешов.
Қаржылық қиындықтар
Бұрынғы спортшы қаржылық жағдайының қиын екенін жасырмады. Алмас Өтешов несиеге байланысты қиындықтарын айтып, қаржылық мәселелері шешілсе, бапкер ретінде қызмет етуге дайын екенін жеткізді.
«Менің 15 миллион 400 мың теңге қарызым бар. Егер қарызымнан құтылсам, ертең-ақ бапкер болып жұмысқа кірісуге дайынмын. Жұмыс берген адамды ұятқа қалдырмайтыныма сенімдімін», – деді спортшы.
Өмірдің қиын кезеңдері
Алмас Өтешов қиын кезеңдерде ішімдікке салынып, тіпті күзетші болып жұмыс істеуге мәжбүр болғанын айтты. Оның емделуіне ауыр атлет Илья Ильин қолдау көрсетіп, сауықтыру орталығында ем алуына көмектескен. Спортшыны емдеуге шамамен 2 миллион теңге жұмсалған.
