Мамандар шизофрения дертіне шалдыққан балаларды дер кезінде емдеу маңызды екенін айтады. Ата-аналардың ауруды жасыруы қоғамға қауіп төндіруі мүмкін. Бұл туралы заңгер Айгүл Орынбек дабыл қақты, деп хабарлайды Тodayinfo ақпараттық порталы.
«Қазақстанда шизофрениямен ауыратын науқастарға жеткілікті көңіл бөлінбей отыр. Әсіресе қазақ қоғамында бұл ауруға қатысты түсінік терең емес. Кейбір ата-аналар балаларындағы психикалық ауытқуларды байқаса да, дәрігерге қаралуға асықпайды. Оның орнына «құс келгенде, құс кеткенде ауырады» деп, үйде бақылап отыруды дұрыс санайды. Алайда бұл — созылмалы және толық жазылмайтын дерт екенін ескеру қажет», — дейді заңгер.
Ауруды дер кезінде емдеу маңызды
«Шизофрениямен ауыратын науқастардың ойлау қабілеті мен қиялы кейде сау адамдардан да ерекше болуы мүмкін. Бірақ бұл дертке шалдыққандардың мінез-құлқы бақылаудан шығып, қауіпті жағдайларға апаруы ықтимал. Дәрігерлер дер кезінде арнайы медициналық бақылау жасалмаса, қоғамға үлкен қауіп туындауы мүмкін екенін ескертеді», — деді Айгүл Орынбек.
Ол резонанс туғызған жағдайлдарды айтып өтті.
«Мен халықпен тығыз жұмыс істейтіндіктен, мұндай диагнозбен талай рет кездескенмін. Алғаш рет осыдан 6-7 жыл бұрын Маржан есімді қыздың оқиғасы қоғамда үлкен резонанс тудырған еді. Қыздың құжаттарын тексеріп, анасы мен дәрігерлермен сөйлесіп, оның ұзақ жылдар бойы ем алғанын анықтаған соң, мамандардың пікіріне сүйеніп, сол мекемеде қалуы дұрыс деген тұжырымға келдім. Бірақ қоғам бұл жағдайды біржақты қабылдап, маған түрлі айып тақты», — дейді сарапшы.
Қоғамның түсінігі өзгеруі тиіс
«Мұндай жағдайлар қоғамда жиі қайталанады. Лифтідегі баланың бетін пышақпен тілгілеген оқиға соның дәлелі. Жақында Қарағандыда тағы бір оқиға тіркелген. Кішкентай бала көршісіне пышақпен шабуыл жасаған. Бала бұған дейін Алматыда үш жыл ем алған, бірақ дәрігерлер оның әлі де қоғамға қауіпті екенін айтып, шығаруға асықпаған. Анасы баласын үйіне алғысы келгенімен, дәрігерлердің шешімі басқаша болды», — деді ол.
Мамандар пікірі — басты бағдар
«Кез келген ана өз баласын ақтап алғысы келеді. Бірақ ақиқат басқаша. Психикалық ауытқуы бар баланы қадағалау қиын. Сондықтан сарапшы мамандардың пікіріне құлақ асқан дұрыс. Бізде шизофренияға шалдыққан балалардың санын азайту үшін ата-аналардың ауруды жасырғаны үшін қылмыстық жауапкершілік енгізу мәселесі қарастырылуы тиіс. Бұл қоғамның қауіпсіздігін қамтамасыз ету үшін маңызды қадам», — дейді маман.
