Мәжіліс депутаты Ринат Зайытов Мәжіліс отырысында латын әліпбиіне көшу мен дауыстық жарнамаға қатысты маңызды мәселелерді көтеріп, жауапты органдарға сауал жолдады,деп хабарлайды Todayinfo ақпарат порталы.
Депутаттың айтуынша, республикалық маңызы бар қалалар шетелдік туристер көп келетін аймақтар болғанымен, көшедегі маңдайша жазулар үш түрлі әліпбиде беріледі.
«Қазір минимализм заманы. Кириллицаны екінің бірі түсіне бермейді. Сондықтан, кем дегенде мемлекеттік емес мекемелердің маңдайша жазуларын дизайн кодқа сай тек латын әліпбиімен рәсімдеу туралы ұсыныс берілсе, Үкіметтің көзқарасы қандай?», – деп сұрады Зайытов Сауда және интеграция министрі Серік Жұманғариннен.
Сонымен қатар, депутат Астана мен Алматы қалаларының әкімдіктерінен дауыстық жарнамаға қойылатын шектеулерге қатысты түсініктеме беруді сұрады.
«Сіздер дауыстық жарнаманы тоқтатамыз деп жатырсыздар. Ол қалай жүзеге асады? «Алтын орда» базарында Мұқағалидің өлеңдерін оқып, кітап сататын ағамыз бар. Оны көру үшін арнайы баратын адамдар бар. Ол неге жазықты?Немесе Астанада Шәмшінің әндерін орындайтын апамыз, Алатау театрының «Қазақша терапия» ұжымы бар. Олардың қымбат билбордтарға жарнама жасауға мүмкіндіктері жоқ. Сондықтан домбыраларын алып, метро ішінде өнер көрсетіп, жарнамаларын жасап жүр.Бұл ерекше әрі мәдениетті жарнама түрі. Оларға да айыппұл саласыздар ма? Олардың жағдайы не болмақ?», – деп сұрады Зайытов.
