Фото: Depositphotos.com
Қасиетті Рамазан айы – мұсылман баласы үшін рухани тазару мен қайырымдылыққа ұмтылатын ерекше кезең. Бұл айда жасалған әрбір игі істің сауабы еселенетіні белгілі, деп хабарлайды Todayinfo агенттігі.
Ауызашар беру – сауапты амалдардың бірі, алайда соңғы уақытта еліміздегі мейрамханалар мен кафелердің ауызашар мәзірін тым қымбатқа ұсынуы халық арасында түсінбеушілік тудырып отыр.
Қазақстан мұсылмандары діни басқармасы (ҚМДБ) кәсіпкерлерді ауызашар дастарқанында ысырапқа жол бермеуге және халыққа қолжетімді баға ұсынуға шақырды.
«Қасиетті Рамазан – қарапайымдылық пен мейірімділік айы. Ауызашар дастарқаны ысырапқа жол бермей, қарапайым әрі шынайы ықыласпен жасалуы керек. Алла Тағала ысырап етушілерді жақсы көрмейді», – делінген ҚМДБ мәлімдемесінде.
Дін өкілдері ауызашар дастарқанында бәсекеге түсу емес, мұқтаж жандарға көмектесу маңызды екенін еске салып, қасиетті айда мейірімділік пен ортақ жауапкершілік танытуға үндеді.
