Қазақстанда Ішкі істер министрлігі кезекті «STOP-трафик» операциясын өткізді. Үш күнге созылған іс-шара барысында адам саудасы, жезөкшелікпен айналысуға тарту, жеңгетайлық және басқа да құқықбұзушылықтар бойынша 40 қылмыс анықталды, деп хабарлайды Todayinfo.
Кәмелетке толмағандарға қатысты қылмыстар
Түркістан облысында Telegram желісіндегі жабық топтарда кәмелетке толмағандардың порнографиялық бейнежазбаларын сатқан 2006 және 2007 жылы туған екі жасөспірім ұсталды. Тергеу ҚК-нің 312-бабы (порнографиялық материалдарды дайындау және тарату) бойынша жүргізілуде.
Қарағанды облысында 60 жастағы ер адам ақша үшін қыздардың аналарымен келісім жасап, оларға қатысты жыныстық сипаттағы азғындық әрекеттерді ұйымдастырған. Ол ҚК-нің 121-бабы (сексуалдық зорлық-зомбылық) және 135-бабы (кәмелетке толмағандар саудасы) бойынша тергелуде.
Жезөкшелік пен адам саудасы
Шымкентте ұйымдасқан қылмысқа қарсы күрес басқармасы 18-23 жас аралығындағы қыздарды жалдамалы пәтерлерде жезөкшелікке тартқан төрт адамнан тұратын қылмыстық топты ұстады. Олар жәбірленушілерді интимдік фотолар арқылы бопсалап отырған.
Алматыда полиция боди массаж салондарын ұйымдастырған жеті адамды қолға түсірді. Тергеу жеңгетайлық дерегі бойынша жүріп жатыр.
Абай облысында екі адам шаруа қожалықтарында жұмыс істеуге күштеп сату фактісі бойынша ұсталды. Бұл қылмыс ҚК-нің 128-бабы (адам саудасы) бойынша тергелуде.
Заңсыз мигранттар мен көші-қон заңнамасын бұзу
Жамбыл облысында бір зауыттың аумағында көші-қон заңнамасын бұза отырып жұмыс істеген шетелдік азаматтар анықталып, полицияға жеткізілді.
Солтүстік Қазақстан облысында құрылыс нысандарында заңсыз жұмыс істеген 14 шетелдік ұсталды.
ІІМ хабарлауынша, барлық күдіктілер уақытша ұстау изоляторына қамалып, соталды тергеу жұмыстары басталды.
