Фото: todayinfo.kz
Алматы қалалық Полиция департаменті Әкімшілік полиция басқармасына қарасты процессингтік орталықтың бастығы Айдын Меркімбаев мопедті тіркеу мерзімі аяқталуға жақын екенін және 5 сәуірден кейін тіркелмеген көліктердің иелері әкімшілік жауапкершілікке тартылатынын ескертті, деп хабарлайды Todayinfo ақпараттық агенттігі.
– Айдын мырза, қазіргі таңда мопед тіркеу бойынша қандай деректер бар?
– Бүгінгі таңда 7 081 мопед тіркелді, оның ішінде 2 785-і экстерриториалдылық қағидаты бойынша рәсімделген. Бұл – жүргізушілердің заң талаптарын орындауға деген жауапкершілігінің артып келе жатқанын білдіреді. Дегенмен, әлі де тіркеуден өтпеген көптеген мопед иелері бар.
– 5 сәуірден кейін мопедін тіркемегендер қандай жауапкершілікке тартылады?
– Егер мопед тіркелмесе немесе «А1» санатындағы жүргізуші куәлігі болмаса, иелері Қазақстан Республикасының әкімшілік заңнамасына сәйкес жауапқа тартылады. 590-баптың 2-бөлігі, 590-баптың 2-1-бөлігі, 612-бап және 797-бапқа сәйкес келесі жаза түрлері қарастырылған:
✔️ 10 АЕК (34 500 теңге) көлемінде айыппұл
✔️ 20 АЕК (69 000 теңге) көлемінде айыппұл
✔️ Көлік құралын басқару құқығынан 1 жылға айыру
✔️ Мопед айыппұл тұрағына қойылады
«Бұл – жай ғана айыппұл емес, көлік құралын басқару құқығынан айырылуға дейін баратын қатаң жаза. Сондықтан мопед иелерін соңғы минутқа дейін күтпей, көліктерін тез арада тіркеуге шақырамыз» – деді Айдын Беркінбаев.
– Мопедті қалай тіркеуге болады?
– Мопедті тіркеу үшін иесі немесе оның өкілі келесі құжаттарды ұсынуы қажет:
🔹 Жеке басын куәландыратын құжат (қағаз немесе электрондық түрде)
🔹 Тіркеу үшін алымдар:
Тіркеу алымы – 0,25 АЕК (983 тг.)
Көлік құралын тіркеу туралы куәлік (СРТС) – 1,25 АЕК (4915 тг.)
Мемлекеттік нөмір алу – 1,4 АЕК (5505 тг.)
🔹 Мемлекеттік тіркеуге арналған өтініш
🔹 Техникалық құжат немесе мопедтің техникалық сипаттамалары туралы ақпарат
🔹 Егер мопедтің идентификациялық нөмірі жоқ болса, уәкілетті орган оны тіркеуге дейін тағайындайды
🔹 Көлік құралының тексеру актісі (алғашқы тіркеу кезінде)
🔹 Бұрынғы СРТС және мемлекеттік нөмір (бар болса)
🔹 Сатылым шарты немесе сенімхат (егер мопед иесінің өкілі жүгінсе)
– Тіркеу процесі қанша уақыт алады?
– ҚР Ішкі істер министрінің №862 бұйрығына сәйкес, мопедті тіркеу процесі 90 минут ішінде жүзеге асырылады. Бұл азаматтарға ыңғайлы болу үшін жасалған тиімді жүйе.
– Азаматтарға қандай кеңес бересіз?
– Біз мопед иелерін тіркеуді кейінге қалдырмай, уақытылы рәсімдеуге шақырамыз. Көп адам соңғы сәтте жүгіріп келеді, бірақ құжаттарды алдын ала дайындаған дұрыс. «Егер мопедіңіз тіркелмеген немесе жүргізуші куәлігіңіз болмаса, 5 сәуірден кейін жолға шығуға болмайды. Құқық бұзған жағдайда, көлігіңіз айыппұл тұрағына қойылады, ал өзіңіз қомақты айыппұл арқалайсыз» – деді Айдын Беркінбаев.
«Заң талаптарын сақтау – сіздің қауіпсіздігіңіз бен қорғанысыңыз. Сондықтан, уақытылы тіркеліп, жол қозғалысы ережелерін сақтауға шақырамыз», – деп түйіндеді ол.
