Әлеуметтік желіде Асылхан есімді азамат Magnum сауда желісі арқылы азық-түлікке тапсырыс бергенін, оны жеткізген курьердің өзінен қазақша сөйлеуді талап еткенін айтады. Осыдан кейін ол пост жазған. Мұны көрген компания басшылығы қызметкерді жұмыстан шығарған, деп хабарлайды Todayinfo Qaz365.kz— ке сілтеме жасап.
«Мен шағым түсірмедім. Бірақ постымды оқып, курьерді жұмыстан шығарыпты. Енді қайта кіре алмайтын болған», — дейді желі қолданушысы.
Осыдан кейін Facebook-те резонанс басталды. Руслан Түсіпбеков есімді белсенді бұл мемлекеттік тілге жасалған қастандық екенін айтқан.
«Бір қазақ екінші қазақты қазақша сөйле деп ренжітті. Соңғысы жұмыстан қуылды. Біріншісі өкінетін сияқты, бірақ Magnum компаниясының логистикалық директорының өзі хабарласып, мәселені шешкеніне өте қуанышты.Міне, Тәуелсіздіктің 34-ші жылында Ұлы далада болып жатқан жайттар осындай. Мысалы, Ресейдегі жағдайды елестетіп көріңіз. Ресейде орыс тілінде сөйлеуді сұраған курьерді жұмыстан шығару – қоғамда үлкен резонанс туғызар еді. Бұл жағдайда Ресейде, ресми тіл — орыс тілі болғандықтан, қызметкерлердің ресми тілде сөйлесуге құқығы бар деп саналады. Мемлекеттік тілде сөйлесуді талап еткен қызметкерді еш жерде жұмыстан шығаруға жол берілмейді. Бізге оңай! Осыдан кейін бізді кім сыйлайды?»- дейді Руслан Түсіпбеков.
Бұл постқа Magnum өкілі жауап беріпті.
«Біз өз жұмысымызда Қазақстан Республикасының заңнамасын басшылыққа аламыз. Мемлекетіміздің Конституциясына сәйкес: «Мемлекеттік ұйымдарда, жергілікті өзін-өзі басқару органдарында, және ұйымдарда орыс тілі ресми түрде қазақ тілімен тең қолданылады».Біз адамдарды ұлтына қарай бөлмейміз және барлық сатып алушыларымызға бірдей қамқорлық жасаймыз. Біз жұмысымыз барысында сатып алушыларды тәрбиелемеуіміз және оларға мәдени немесе басқа да дүниетанымдық талаптар қоймауымыз керек. Сондықтан біз қызметкерімізді сөйлесу тілі үшін емес, сатып алушымен қарым-қатынас жасау мәнері, жұмыс орнындағы лауазымды асыра сілтеп пайдаланғаны үшін жұмыстан босаттық», — дейді компания өкілі.
Желіде қоғам қайраткерлері Magnum сауда желісіне жаппай бойкот жариялап жатыр.
«Бойкотқа қосыл: Magnum Cash&Carry-ге бармаймын, оннан ешқандай зат
алмаймын!» деген сөйлеммен журналист Дина Елгезек, кәсіпкер Шыңғыс Мұқан секілді азаматтар халықты науқанға қосылуға шақырды.
