Іле өзенінің бойынан 12 тонна қоқыс шығарылды. Қонаев қаласында «Таза Қазақстан» акциясы аясында шаһар маңындағы аумақтар да қоқыстан тазартылып жатыр, деп хабарлайды Todayinfo ақпараттық агенттігінің тілшісі.
Мысалы, бүгін «Таңбалы тас» ескерткішінің аумағынан Іле өзенінің бойын жағалай, 4 шақырым аумақ тазаланды. Алдын ала жүргізілген зерделеуге сәйкес, мұнда демалушылардан қалған 7 стихиялық қоқыс орны анықталды. Сенбілікте оның барлығы түгелдей тазаланды. Іс-шараға Жастар ресурстық орталығының еріктілері, сондай-ақ Қонаев қаласының тұрғындарынан, коммуналдық қызмет көрсетуші компания мамандарынан құралған топ қатысты. Тазалық жұмысына 150-ден астам адам тартылып, 12 тонна қоқыс шығарылды.
«Жастар, демалушылар айналаны таза ұстап, табиғатқа қамқорлық танытуы тиіс. Бұл – алдымен адамгершіліктің белгісі. Балалар жастайын елін де, жерін де сүйіп өсуі қажет. Ал жерін сүйген азаматтан халықтың да, Жер Ананың да қамын ойлайтын ер шығады. «Таза Қазақстан» жалпыұлттық акциясын қолдаймыз. Үнемі сенбіліктерге шығып отырамыз. Барша жұртты тазалық мәдениетін сақтауға шақырамын. Патриот адам далаға қоқыс тастамайды, Отанды сүю елге, жерге жанашырлықтан тұрады», — деді «Jastar» волонтерлік тобының жетекшісі Ұлық Баймұрат.
Айта кетейік, бұған дейін «Көшпенділер» қалашығының маңында 2 рет сенбілік өткізіліп, 18 тонна қоқыс шығарылған.
Естеріңізге салсақ, ҚР ӘҚБтК-нің 434-2, 505-баптарына сай, заңсыз жерде қоқыс тастағаны үшін айыппұл салу көзделген.
Алдағы уақытта жоғарыда аталған туристік орындарға «Таза Қазақстан» акциясының маңыздылығы туралы ақпараттық тақтайшалар орнатылып, бақылау күшейтіледі.
