Абай облысының әкімі Берік Уәли Хорватия Республикасының Қазақстандағы Төтенше және өкілетті елшісі Рефик Шабановичпен ресми кездесу өткізді. Бұл кездесудің маңызы – Қазақстан мен Хорватия арасындағы дипломатиялық қарым-қатынастың орнағанына 30 жылдан астам уақыт өтіп, екі ел арасындағы әріптестіктің жаңа белеске көтерілгенін айқын көрсетеді. Бұл туралы Todayinfo ақпарат агенттігі хабарлайды.
Кездесу аясында тараптар туризм, білім беру, логистика және инновациялық салаларда бірлескен жобаларды жүзеге асыру жолдарын талқылады. Елші Рефик Шабанович Астанада алдағы уақытта өтетін ірі бизнес форум жайлы хабар беріп, Абай облысының кәсіпкерлерін осы маңызды шараға қатысуға шақырды. Форумға екі елдің салалық министрліктері мен ірі бизнес қауымдастықтары қатысады деп күтілуде.
Хорватия – сенімді инвестициялық серіктес
Кездесу барысында елші Хорватияның көлік, фармацевтика және ақпараттық технологиялар салаларындағы әлеуетін ерекше атап өтті. Оның айтуынша, бұл салаларда Қазақстанмен, әсіресе Абай облысымен тығыз әріптестік орнатуға үлкен мүмкіндік бар. Алматы қаласында жұмыс істеп жатқан бірнеше хорват фармацевтикалық компаниялар сәтті жұмыс жүргізуде. Осы тәжірибені негізге ала отырып, Хорватия Абай облысында да фармацевтикалық өндіріс ашуға ниетті.
“Қазақ елімен барлық салада ынтымақтастығымызды кеңейткіміз келеді. Сіздердің тараптан қолдау болса, осындай компанияны Абай облысында да ашқымыз келеді. Басқа да салаларда бірлесе жұмыс істеуге дайынбыз”, – деді елші мырза.
Абай облысы ынтымақтастыққа ашық
Облыс әкімі Берік Уәли құрметті мейманға алғысын білдіріп, Абай өңірінің инвестиция мен халықаралық әріптестікке әрқашан ашық екенін атап өтті.
“Құрметті елші мырза, Абай еліне қош келдіңіз. Сіздің біздің елімізде ұзақ жылдар жұмыс істеген, ең тәжірибелі елші екеніңізді жақсы білемін. Екі елдің саяси, әлеуметтік, экономикалық қарым-қатынасын нығайтуға қосып жатқан үлесіңіз зор. Кездесуде айтқан ұсыныстарыңызды қуана қабыл аламыз. Салалық басқармаға тиісті тапсырма беремін. Біздің өңірге жаңа жобалар өте қажет. Бірлесіп жұмыс істеуге дайынбыз”, – деді аймақ басшысы.
Сарапшылар не дейді?
Сарапшылардың пікірінше, бұл кездесу Қазақстан мен Хорватия арасындағы экономикалық байланысты нығайтуда стратегиялық маңызға ие. Хорватия Еуроодақ елдерінің ішіндегі дамыған логистика жүйесі мен жоғары технологиялық фармацевтикалық өнеркәсібімен ерекшеленеді. Егер аталған жобалар жүзеге асса, Абай облысы үшін жаңа жұмыс орындары мен инвестициялық ағынның артуы күтіледі.
Берік Уәли мен Рефик Шабановичтің кездесуі Абай облысының халықаралық экономикалық картасындағы орнын нығайта түсуге бағытталған нақты қадамдардың бірі болып отыр. Мұндай ынтымақтастық болашақта өңірдің дамуына тың серпін бермек.
