Абай облысының әкімі Берік Уәли Қытай Халық Республикасының Шыңжаң ұйғыр автономиялық өлкесіне ресми сапармен барып, өңіраралық ынтымақтастықты нығайту бағытында маңызды кездесу өткізді. Бұл туралы Todayinfo ақпарат агенттігі хабарлайды. Делегация құрамында мемлекеттік қызметкерлер, мәслихат депутаттары, кәсіпкерлер мен білім саласының өкілдері болды. Айта кетейік, 100-ден астам адамды құраған делегация ҚХР Шыңжаң өлкесіне келген ең ауқымды іскерлік сапар болып отыр.
Өңіраралық байланыс – стратегиялық маңызы бар бағыт
Қытайдың Алтай қаласында өткен кездесуге Шығыс Қазақстан мен Жетісу облыстарының делегациялары да қатысты. Жиынды Шыңжаң ұйғыр автономиялық өлкесінің партия комитетінің хатшысы Ма Синжуй ашып, Қазақстан мен Қытай арасындағы ынтымақтастықтың жоғары деңгейде екенін атап өтті. Ол шекаралас аймақтар арасындағы серіктестікті кеңейтуге толық дайын екенін білдірді.
Абай облысының мүмкіндіктері мен ұсыныстары
Өз сөзінде облыс әкімі Берік Уәли Мемлекет басшылары Қасым-Жомарт Тоқаев пен Си Цзиньпин арасындағы достық байланысты негізге ала отырып, өңіраралық ынтымақтастықты тереңдетуге ниетті екенін мәлімдеді. Ол Абай облысының Қытай мен Ресейге шекаралас, халықаралық көлік дәліздеріне ашық аймақ ретінде географиялық артықшылығын, көлік-логистикалық әлеуетінің жоғары екенін атап өтті.
2024 жылы облыстың сыртқы сауда айналымының 89 пайызы Қытаймен жүргізілген. Экспорт көлемі 2,1 миллиард АҚШ долларына жетіп, бір жыл ішінде бес есе артқаны – екіжақты сауданың өсіп келе жатқанын дәлелдейді.
Ірі жобалар мен жаңа бастамалар
Шыңжаң партия комитетінің оң жағына жайғасқан Берік Уәли Қытай инвестициясымен іске асып жатқан төрт ірі жобаны атап өтті:
-
Құны 1,5 млрд доллар болатын мыс балқыту зауыты,
-
30,4 млн долларлық ағаш өңдеу комбинаты,
-
250 млн доллар тұратын көмір-химия кешені,
-
107 млн долларлық жел электр станциясы.
Бұл жобалар Абай облысының өндірістік-индустриялық әлеуетін арттырып, жаңа жұмыс орындарын құруға, технологиялық жаңғыруға серпін бермек.
Логистика, ғылым және көлік қатынасы
Өңір басшысы қос ел арасындағы көлік қатынасын арттыру мақсатында “Семей – Үрімші” және “Семей – Шәуешек” бағыттары бойынша тікелей әуе рейстерін ашуды ұсынды. Сонымен қатар, «Аягөз-Тачен» темір жол желісін іске қосу өңір экономикасына оң әсер ететіні айтылды.
Курчатов қаласының ғылыми әлеуетіне тоқталған әкім, Шыңжаңдағы технологиялық орталықтармен бірлескен ғылыми жобалар жүргізуге дайын екенін білдірді. Бұл білім, ғылым, инновация салаларындағы интеграцияны күшейтуге жол ашады.
Берік Уәли кездесудің өңіраралық байланыстарға жаңа серпін беретінін атап өтті. Оның айтуынша, Абай облысы Қытай, Ресей және Орталық Азияны жалғайтын логистикалық хаб ретінде қалыптасуға барлық мүмкіндікке ие. Облыс әкімі Ма Синжуйді ресми сапармен Абай облысына шақырды.
Шыңжаң ұйғыр автономиялық өлкесінің партия комитетінің хатшысы бұл ұсынысты қолдап, Қазақстанға ресми сапары аясында Абай облысына баруға дайын екенін білдірді.
