Абайдың 180 жылдық мерейтойына арналған бұл шара Облыс әкімдігінің қолдауымен және Мәдениет басқармасының ұйымдастыруымен өтті. Өңірдің он ауданынан 1000-нан астам өнерпаз қатысқан байқау аудандарда басталып, үздіктері облыстық гала концертте өнер көрсетуге жолдама алды, деп хабарлайды Todayinfo ақпараттық агенттігі.
Шараның қорытынды гала концерті кеше Семей қаласындағы Абай театрында ұйымдастырылды. Концерт барысында әр ауданның өкілдері ән-күй, жыр-терме және театрландырылған қойылымдар арқылы ұлттық мәдениетімізді дәріптеп, халқымыздың салт-дәстүрі мен рухани құндылықтарын паш етті.
Байқауға облыс әкімі Берік Уәлиұлы қатысты. Ол өнерпаздарды марапаттап, байқаудың жоғары деңгейде ұйымдастырылғанын атап өтті. Әкімнің айтуынша, бұл шара жыл сайын дәстүрлі түрде өтетін болады.
Номинациялар мен жүлделер:
Байқауға белсене қатысқан аудандар «Үміт», «Шабыт», «Дарын», «Өнер достығы», «Креативті үздік ұжым», «Ұлттық өнер дарабозы» және «Өнерлі өлке» номинацияларымен марапатталып, 1 миллион теңге көлемінде сыйақы алды.
Жүлделі орындар:
3-орын: Үржар ауданы. Мәдениет үйіне 5 миллион теңгеге кәсіби дыбыс жазу студиясы сыйға тартылды.
2-орын: Аягөз ауданы. Мәдениет үйіне 12 миллион теңгеге музыкалық аппаратура берілді.
1-орын: Абай ауданы. Мәдениет үйіне 20 миллион теңгелік шағын автобустың кілті табысталды.
Мәдениет саласының қазіргі жағдайы:
Бүгінгі таңда Абай облысында 296 мәдениет мекемесінде 3000 адам жұмыс істейді. Бұл мекемелер қатарында 137 кітапхана, 131 клуб, 10 музей, 9 архив, 1 театр және 1 филармония бар.
Бұл байқау өңір мәдениетінің жаңа деңгейге көтерілуіне үлес қосып, ұлттық өнерді дамытуға зор серпін берді.
