Облыс әкімі Берік Уәли Жаңасемей ауданына жұмыс сапары барысында Қайнар ауылында өңірдің ақсақалдарымен кездесті.
Басқосуға қоғамдық кеңес мүшелері, ардагерлер кеңесінің өкілдері, ауданның бірнеше ауылының ардагерлері қатысты, деп хабарлайды Todayinfo ақпараттық агенттігі.
Кездесу барысында ақсақалдар Жаңасемей ауданындағы өзекті мәселелерді көтерді. Шаруа қожалықтарын электр энергиясымен қамтамасыз ету, әлеуметтік нысандарды күрделі жөндеуден өткізу, жастарға мал шаруашылығымен айналысу үшін жер бөлуге қатысты ойларын ортаға салды.
Сонымен қатар, бұрынғы полигон аймағына қатысты түйткілдерді, ауылдарда интернеттің баяулығын, ауыз су тапшылығын және жол мәселесін көтерді. Бос тұрған ғимараттарды жөндеп, ел игілігіне пайдалануды, елді мекендерге спорт кешендерін салуды, кен орындарын жергілікті жерде тіркеуге байланысты ұсыныстарын айтып, толғандырған сұрақтарын қойды.
Облыс әкімі кездесуде айтылған ұсыныстардың барлығы назарға алынатынын айтып, көтерілген өзекті мәселелер кезең-кезеңімен шешілетінін жеткізді.
«Жұмыс сапарымен облыстың 10 ауданы мен екі қаласын аралап шықтым. Бүгін шалғайдағы елді мекендердің өзекті мәселелерін халықтың өз аузынан естиін деп бұрын аудан орталығы болған Абыралы өңіріне арнайы келіп отырмын. Абыралы – тарихы терең, белгілі тұлғалар, қайраткерлер, ғалымдар, ақын-жазушылар шыққан қасиетті мекен. Бұл өңірдің экологиялық мәселесін үнемі назарымда ұстаймын. Семей полигонына байланысты экологиялық қосымша төлемдерді қайта қарау мәселесін орталыққа жеткіздім. Алдағы уақытта Баршатас, Таскескен, Шар сияқты елді мекендердің тыныс-тіршілігімен, мәселелерімен танысуды жоспарлап отырмын. Кездесуде қойылған сұрақтар мен ұсыныстардың ешбірі елеусіз қалмайды. Мәселелерді қарастырып, нақты шешім қабылдаймыз. Өңірдің түйткілді мәселелерін жүйелі түрде шешетін боламыз» – деді аймақ басшысы.
