Абай облысы, Семей қаласы – Мұхтар Әуезов атындағы педагогикалық колледжде өткен MEETUP-кездесу барысында «Адал азамат» біртұтас тәрбие бағдарламасын жүзеге асыру мәселелері кеңінен талқыланды. Жиынға облыс әкімі Берік Уәли, облыстық мәслихат төрағасы, ардагер ұстаздар, жоғары және орта білім беру ұйымдарының басшылары, білім саласының қызметкерлері мен студенттер қатысты, деп хабарлайды Todayinfo ақпарат агенттігінің тілшісі.
«Адал азамат» – ұрпақ тәрбиесінің темірқазығы
Кездесуді ашқан облыс әкімі Берік Уәли Мемлекет басшысы Қасым-Жомарт Тоқаевтың «Әділетті Қазақстан – Адал азамат» Ұлттық құрылтайда сөйлеген сөзіне сүйене отырып, бағдарламаның маңыздылығына тоқталды. Ол білім мен тәрбиенің қатар жүруі – саналы ұрпақ қалыптастырудың басты шарты екенін атап өтті.
«Адалдық – адамзаттың асыл қасиеті. Жас ұрпаққа тек білім ғана емес, рухани құндылықтар, парасат пен ізгілік дарыту – ұстаздардың басты міндеті», – деді аймақ басшысы.
Сонымен қатар, ол өңірде іске асырылатын маңызды жобалар туралы айтып өтті. Атап айтқанда, Семейдегі Оқушылар сарайының құрылысын аяқтау үшін қаржы бөлінгенін, сондай-ақ жастар бастамаларын қолдау мақсатында Жастар ісі жөніндегі басқарма құрылатынын мәлімдеді.
Ұстаздар мен студенттердің үнқатысу алаңы
Кездесуде білім саласының ардагерлері мен үздік мамандары сөз сөйлеп, өз пікірлерімен бөлісті. Қазақстанның Еңбек Ері Алма Шүкіжанова, колледж директоры Шағангүл Жанаева, ардагерлер кеңесінің төрайымы Мәдениет Ахметова, университет проректоры Айрат Базенов, үздік педагог Ирина Бочарова және үздік студент Шоқан Баймулаев өздерінің тәжірибелері мен көзқарастарын ортаға салды.
Сұрақ-жауап бөлімінде қатысушылар облыс әкімінен білім беру жүйесі, жастарды жұмыспен қамту, ауылдық жерлердің инфрақұрылымын дамыту және «Таза Қазақстан» бағдарламасына қатысты мәселелер жөнінде сұрап, нақты ұсыныстарын айтты.
Тарихи оқу орны – болашақтың кепілі
Кездесуден бұрын Берік Уәли Мұхтар Әуезов, Қаныш Сәтбаев, Әлкей Марғұлан сынды көрнекті тұлғалар білім алған, 120 жылдық тарихы бар оқу орнының кабинеттерін аралап, колледждің музейі мен кітапханасының жұмысымен танысты. Сонымен қатар, «Шабыт», «Smart bala», «Балалар кітапханасы», «Қамқор», «Еңбегі адал – жас өрен», «Ұшқыр ой алаңы» жобалары аясында ұйымдастырылған көрмені тамашалады.
«Адал азамат» біртұтас тәрбие бағдарламасы – болашақ ұрпақты парасатты, ізгі әрі елжанды етіп тәрбиелеудің жаңа бағдары. Мұндай кездесулер қоғам мен билік арасындағы ашық диалогты дамытып, білім беру саласының өзекті мәселелерін шешуге мүмкіндік береді.
