Әйгілі әнші, Халық әртісі Роза Рымбаеваның келіні – Акерке Бүркітбай жары Әли Оқаповтың 2023 жылы «Құрмет» орденімен марапатталуы кезінде отбасында орын алған қиын жағдай туралы айтты. Оның айтуынша, бұл оқиға қоғамда үлкен дау туғызып, отбасы үшін ауыр кезең болды, деп хабарлайды Тodayinfo ақпараттық порталы.
Акерке Бүркітбай бұл тақырыпқа Тимур Балымбетовке берген сұхбатында тоқталды. Ол марапаттау сәтінен кейін басталған қоғамдағы айыптаулар Әли Оқаповқа үлкен психологиялық ауыртпалық түсіргенін жеткізді.
«Тимур, сенің үйіңде отырғанда бәріміз Әлиді құттықтадық. Ертеңіне дау басталып кетті. Өзіміз де қорқып кеттік. Кореяда осындай шудан көп әртіс өзіне қол жұмсап жатыр. Әлидің сол кездегі ішкі арпалысын біз сырттай көрдік. Қолымыздан келгенше, жанында болып, қолдауға тырыстық. Өте қиын кезең болды», – деді әнші.
Оның айтуынша, бұл жағдай тек Әли Оқаповқа ғана емес, Роза Рымбаеваға да ауыр соққы болған. Әншінің анасы қоғам тарапынан көптеген ауыр сөз естіген.
«Халық әртісі болмаса да, ешбір ана өзінің баласы үшін ондай сөз естімеуі керек. Бұл жағдайға біреулер себепкер болды деп ойлаймын. Әлиді халық жауындай көрді. Сол оқиғадан кейін ол бір апта бойы нәр татпады, басын көтермеді. Көз алдымызда солып, өртеніп бара жатқандай болды. Анамыз үйіне шақырып, көңілімізді аулады. Ол ештеңе болмағандай, шай дайындап, Зейінді бақты. 50 жыл сахнада жүріп, естімеген сөзі қалмаған. Ол ешкімнің сөзін көңіліне алмайды. Әлиге де соны айтты», – деді Акерке Бүркітбай.
2023 жылдың қазан айында Әли Оқапов «Құрмет» орденімен марапатталған болатын. Алайда бұл шешім әлеуметтік желіде үлкен дау тудырды. Көпшілік әншінің мұндай жоғары марапатқа лайық еместігін айтып, сынға алды.
Роза Рымбаева да осы оқиғаға қатысты пікір білдіріп, ұлының еңбегі еленгенін және «Құрмет» ордені оған әділ берілгенін алға тартқан еді.
