Ұлт жанашыры, белгілі кәсіпкер Дулат Тастекей өзгеше бастама бастап, жағымды жаңалығымен бөлісті. Ол дүниеге келген ұлына Абайдың атын қойған ата-анаға сыйақы тағайындады. Енді дүниеге келгенде ұлы ақынның есімі қойылған ұлға 180 мың теңгеден берілмек, деп хабарлайды Todayinfo.
Тек сыйақы биылғы жылдың 10 тамызы күні дүниеге есігін ашқан сәбилерге ғана беріледі.
«2025 жылы ұлы қазақ ойшылы әрі ақыны Абай Құнанбайұлының туғанына 180 жыл толады. Осыған орай, ASSYLTAS қоғамдық қоры биылғы жылды Абай жылы деп жариялап, ұлы философтың мұрасын сақтау мақсатында ерекше бастама көтерді. 2025 жылғы 10 тамызда дүниеге келген Абай есімді балаларға 180 000 теңге көлемінде сыйақы тағайындалады. Қапы қалмаңыздар!», — деп жазды Дулат Тастекей.
Көптеген адамдар тарапынан сұрақтар туындаған. Оқырмандар «Неге Абай?», «Неге Ибраһим емес?”, “Қыз туса, Зере деп қойғандарға да сыйақы берілсе ғой» деп жазған. Ол не себепті Абай есімі қойылған балаларға ғана сыйақы тағайындалғанына тоқталды.
«Иә, Абай атамыздың шын есімі басқа, бірақ мұқым қазаққа Абай есімімен танылды. Сондықтан Абай есіміне тоқталдық. Бұдан бөлек, Абайдың есімі менің өмірлік жолымда үнемі кездесіп тұрады. Бұл туралы қызықты 5 факт айта кетейін.
- Кіндігімнің кесілген жері, қазіргі Абай облысы. Ауылда жүріп, Абайдың терең философиясымен, дана сөздерімен кішкентай кезімнен таныс болдым;
- Білім алған ордам, ұшқан ұям – Алматыдағы Абай атындағы Республикалық мектеп-интернат
- Компаниямыздың бас кеңсесі Алматыдағы Абай көшесінің бойында орналасуы да кездейсоқ емес сияқты😀;
- Жеке кабинетімде Абай атамыздың үлкен портреті ілініп тұр
- 2021 жылы әулетімізбен Семей қаласында мешіт салып, оған Абай атамыздың атын бердік», — деп жазды Дулат Тастекей.
