Әскерге аттанып, ауруханадан бірақ шыққан: Маңғыстаудағы даулы оқиғаның жай-жапсары
Маңғыстау облысында әскерге шақырылған 18 жастағы бозбаланың тағдыры қоғам талқысына түсті. Туыстарының айтуынша, сап-сау кеткен ұлдары қызмет барысында психиатриялық ауруханаға түсіп қалған. Қазір бұл іске қатысты құзырлы органдар тексеріс жүргізіп жатыр.
Ақтау гарнизонының баспасөз қызметі оқиғаға қатысты ресми түсініктеме берді.
Ресми нұсқа: Денсаулығы сыр берді ме?
Әскери ведомствоның мәліметінше, сарбаздың өзі денсаулығына шағымданған. Оның бойынан психикалық ауытқу белгілері байқалған соң, жедел түрде медициналық тексеріске жіберілген.
Дәрігерлер кеңесі жас жігітті әрі қарай әскери қызмет атқаруға жарамсыз деп таныған. Осыған байланысты ол денсаулық жағдайына орай запасқа босатылыпты.
Алайда, оқиға мұнымен біткен жоқ. Бұрынғы сарбаз өзіне қатысты заңсыз әрекеттер болғанын айтып, шағым түсірген. Қазіргі таңда осы факті бойынша қылмыстық іс қозғалып, тергеу амалдары жүріп жатыр. Қарулы күштердің қолбасшылығы жағдайды қатаң бақылауға алғанын жеткізді.
Туыстары не дейді: «Бұл – әлімжеттік»
Бұған дейін ақпарат құралдарында Сұлтан Шынтеміров есімді сарбаздың оқиғасы жарияланған болатын. Бейнеу ауданындағы №99116 әскери бөлімінде қызмет еткен ұлдарының жағдайына алаңдаған туыстары мұның астарында «дедовщина» жатыр деп есептейді.
Олардың сөзінше, қысымға шыдамаған сарбаз бірнеше рет суицидке оқталған. Ал әскери бөлім басшылығы болған жайтты жасырып қалу үшін оны психиатриялық ауруханаға жатқызған көрінеді.
Қазір шындық пен жалғанның аражігін тергеушілер анықтап жатыр.
